ANG mga batan-on mao ang paglaom sa yutang natawhan.
Kini ang gipamulong ni Dr. Jose Rizal, ang atong nasudnong bayani. Way makalalis niini kay sila man tuod ang mga lider ug mabuot nga mga lungsuranon ugma.
Ang tingog sa mga tinun-an maoy nakaaghat sa katawhan sa Indonesia pag-abog kang Sukarno isip pamuno sa nasod sa dekada ’60. Ang gisukaran sa diktaduryang Marcos nauyog sa mga tinun-an sa 70’s ug 80’s.
Apan kini karong protesta sa mga tinun-an batok Duterte way padulngan. Tungod kay nagsandig sa sayop nga pagtuo. Gidudahan nga adunay nagsugnib sa mga tinun-an nga mo-protesta.
Kining mga kritiko ug kaatbang sa pulitika ni Digong naninguha gyud nga mabunlot sa ubos ang rating niya sa Pulse Asia ug SWS survey. Kapin man gud sa 80% ang misalig pa nato kang Digong.
Unsang matang diay sa pamuno ang gusto sa mga nagprotestang tinun-an? Kanang gigabayan sa pangurakot? O di kurakot tuod apan kuwang sa pangalagad sa katawhan. Kadtong pamuno ba nga ang Palasyo gihimong imnanan.
Way pamuno nga limpyo kaayo kay way human rights violations nga nahitabo sa iyang administrasyon. Klaro ang pasidaan ni Duterte sa kapulisan nga kadto rang mosukol ang bawsan.
Sa ato pa, natunong sa giingong life preservation and protection ang gihimo sa mga pulis. Wa mopabor kining lindog sa kamatay karon. Apan ang pagpuo sa drugs usa ka dakong gubat.
Maoy gisaad ni Digong ang pagpuril sa drug addiction sa nasod panahon sa iyang kumpanya sa miaging piniliay. Sa nakita daw way kinutoban ang pagpuo sa mga drug personalities.
Ambi, kinsa may inyong ipapuli kang Digong ang puli pamuno karon nga humok pa sa mammon? Angay ning hinuktokan sa atong mga tinun-an. Nga di pada sa mga siba gikan sa mga ambisyuso nga mga kritiko.
Di nato dalion ang atong hukom alang sa kaayuhan sa atong nasod. Wa ba ta ngilngigi ning drugas karon nga daw di na mabangbang sa pagsumpo?