USA ka amahan ang gipatay sa iyang anak ug gilubong sa likod sa ilang balay sa alas 8:10 sa gabii, Lunes, didto sa Purok 7, Barangay Sirib, Calinan District.
Ang biktima mao si Loreto Tomas, samtang ang suspek mao ang iyang anak nga si Jayson Lumbayog Tomas, hamtong ang pangedaron, pulos nagpuyo sa nasampit nga dapit.
Sa inisyal nga imbestigasyon sa Calinan Police Station, nasayran nga gitawgan mismo sa suspek ang iyang inahan nga tua sa Digos City ug gipahibawo nga gipatay niya ang iyang amahan human sila maglalis.
Sumala pa nga gigamit sa suspek sa pagpatay sa amahan ang sanggot pinaagi sa paggulgol sa liog niini nga miresulta sa iyang hinanaling kamatayon.
Daling miuli si Leny ug iyang naabtan ang balde nga nabulit pa sa yuta nga maoy gigamit sa anak sa paglubong sa biktima.
Nagpakitabang dayon si Leny ngadto sa ilang kapitan ug nakaplagan ang gilubngan sa biktima.
Sa kasamtangan, ang patay nga lawas sa biktima gihaya sa Angel Funeral Homes samtang ang kapulisan padayong naghimo og manhunt operation batok sa suspek.