TULO ka mga tawo ang naangol sa pagbusikad og improvised explosive device (IED) didto sa dakbayan sa Tacurong, Sultan Kudarat.
Nahitabo ang pagbusikad sa bomba, alas 6:15 sa buntag niadtong Dominggo, Nobyembre 27.
Ang mga biktima giila nga sila Loren Erazo, Noylen Guerero ug si John Reynan Escanillan, mga molupyo sa Barangay Poblacion, Esperanza.
Gibutyag ni Sultan Kudarat Provincial Police Office Director Raul Supiter nga mibusikad ang bomba atbang sa simbahang katoliko sa Barangay Saliao, duol sab sa usa ka tulunghaan.
Tungod sa kakusog sa impak sa pagbuto sa IED nga gama sa mga ulo sa lansang, 9 volts battery, pulbura ug cellphone isip triggering mechanism, naigo sa mga tipaka sa bomba ang mga biktima.
Mga biktima ang abtik nga gisapupo sa mga pulis nga nagresponde ug gidala ngadto sa Tamondong Hospital diin luwas na sa makuyaw nga kahimtang.
Grupo sa mga local recruit sa teroristang Jemmaah Islamiyah ug Bangsamoro Islamic Freedom Fighters (BIFF) ang gitudlo nga suspek sa pagpamomba.
Apan si Bangsamoro Islamic Freedom Movement spokesman Abu Misry Mama namahayag nga wala silay kalabutan sa pagpamomba.
Sa wala pa mahitabo ang pagbusikad, nakadawat og intelligence report ang mga awtoridad nga dunay hulgang pagpamomba ug surprisang pagpangatake ang mga dautang pundok.
Sa pagkakaron, anaa na sa heightened alert ang militar ug kapolisan sa posibleng halapad nga pagpangatake ug pagpamomba sa mga terorista ug BIFF.