GRABE ka nindot! Kini gyud ang imong masulti kung masud-ong mo na ang nagkadaiyang disenyo sa mga cakes nga apil sa Bakers Cup Cake Display Competition nga parte sa Bakery Fair Davao 2018.
Ang tigum gihimo diha sa SMX Convention Center sa SM Lanang Premier gikan Marso 1 ug natapos Marso 3.
Gatusan ka mga bakers gikan sa nagkadaiyang parte sa Mindanao ug Pilipinas ang misalmot sa tulo ka adlaw nga tigum nga nagpakita sa kung unsa kahalapad ug kanindot ang industriya.
Mga exhibitors iyahay sa pagplastada sa ilang mga produkto, duna say makalingaw nga demo nga added information sa imong baking skills ug interest.
Ug sa sama nakong may "sweet tooth" ang mga cakes gyud ang nakapa-excite kanako.
Ang kompetisyon may duha ka kategoriya, kini ang wedding cakes nga may 14 ka entries ug Best of Davao theme nga may unom ka partisipante.
Sa mga itsura pa lamang sa cakes, makasulti kang di gyud tiaw ang sakripisyo ug talent nga gibubo alang niini.
Nagsilbing hurado sa cake display competition sila Arvin Chua, presidente sa Philippine Society of Baking; Cecil Dela Cruz, presidente sa Davao Bakers Club; Chef Judy Koh nga Managing Director, Principal and Executive Chef sa Creative Culinaire The School and Caffe Pralet; ug Dr. Willie Bejar, Doctor of Business Management Specialization in Hospitality Management, Baking Consultant sa Asian Baking Institute PWU Manila.
Human sa pagsukit-sukit sa mga hurado, miguwang mananaug sa Best of Davao Category ang obra ni Queenie Mae Trinidad Abenom, samtang sa Wedding Cake Category ang gama sab ni Flo Dollaga.
Atol sab sa Bakery Fair nanumpa ang mga bag-ong opisyales sa Mindanao Cake Decorating Society nga gipahural ni konsehal Al Ryan Alejandre.