PARA nako anaa sa saktong posisyon si Senador Antonio Trillanes, sa pagsaway ngadto ni Senador Dick Gordon, ang chairman sa Senate justice committee.
Nagpaklaro man gud sa pagka sipsip ug nagpa-itoy si Gordon ni Presidente Rodrigo Duterte, sa dihang iyang gi-absuwelto sa kalambigitan sa extra judicial killing ( EJK) sa Pilipinas.
Ang nakab-ot nga desisyon ni Gordon pinaagi sa iyang committee report, dili lang pagpaka-uwaw sa katawhan nga mibotar kaniya apil na sa kredibilidad ug nadamay sab ang dignidad sa senado.
Kay ang desisyon ni Gordon, nasukwahi sa mga nakita ni Presidente Barak Obama sa Amerika, United Nations ug European Union nga nagsaway sa EJK sa Pilipinas.
Kon atong sabton gipamulitika ni Gordon, ang katungdanan ug gibaliwa ang kauwaw sa pagsaway sa bagang duot sa katawhan sa grabing patay sa kampanya batok sa problema sa drugas nga miabot na sa sais mil ka mga tawo ang nangamatay.
Gani ning bag-o migawas sa Editorial sa New York Times nga nagsaway kini sa liderato ni Duterte sa nagpadayong EJK sa Pilipinas.
Samtang si Duterte, sud ug gawas sa pamahayag. Kay kaniadto atong masabot kuwang nalang angkunon ang responsibilidad sa pinatyanay sa Pilipinas pinaagi sa pagdasig sa kapulisan sa pagpatay sa mga tawong nalambigit sa paggamit ug pagbaligya sa illegal nga drugas nga patyon.
Dunay higayon ang pag-angkon sa Davao Death Squad ug ang pagpamatay.
Unsa man, gibogoan sa katawhan sila si Duterte? Kay iyang gipahayag karon nga usa ka hugaw nga trabaho ang EJK ug dili kini responsibilidad sa gobyerno.
Klaruhon lang nato. Atong gisuportaan ang kampanya batok sa problema sa illegal nga drugas apan atong gisaway ang sayop nga pamaagi pinaagi sa pagpatay sa mga suspetsado.
Lakip na niini ang atong pagsuporta sa kampanya ni Duterte sa korapsyon sa gobiyerno. Basta ipaagi lang sa tukmang proseso.
Kay ang problema niining atong presidente mora man og maoy naka tag-iya sa Pilipinas pinaagi sa pagpang shortcut sa balaod.
Midaog si Rama ug Tomas
Hangtud karon nagpadayon ang tinubagay nila ni Cebu City Mayor Tomas Osmeña ug kanhi Mayor Mike Rama sa isyu sa paggamit og illegal nga drugas nga miresulta sa pagpa drug test ug sa pagpanikas sa miaging election.
Karon anaa ang bintaha ni Rama human mipabor ang 2nd division sa Comelec sa election protest ug nagsalikway sa counter protest ni Osmeña.
Lisud man gud tuohan ang pagdaog ni Osmeña ug 34 mil kapin nga botos batok ni Rama. Kon atong ibutang nga midaog si Tomas anaa ra tingali sa kapin sa 3mil ug sama ra sa kang Rama kun maoy midaog.
Kay ang kwentada sa naniid sa dagan sa pulitika sa siyudad sa Sugbo sa wapa ang election sikit man kaayo ang away ni Osmeña ug Rama ug dili ingon ani ka dako ang labaw.
Kon atong ibutang nga modaog si Rama sa protista pildi lang kini gihapon. Kay dako kaayog gasto ug moabot nalang ang laing piniliay di gihapon kini maka lingkod. Ang importante ang pagbarog alang sa pagpabor sa kamatooran.
Dungan sa hangyo ni Tomas sa paghunong na sa paggukod sa mga dagkong negosyante sama sa SM, Ayala ug PHILINVEST nga mibobo sa ilang pohunan sa South Road Properties ( SRP.) kay nakakuha kini ug negatibong komentaryo sa katawhan.
(efrenlonzon68@gmail.com Text: 09427930111)