GIKALIPAY ni Mandaue City Mayor Luigi Quisumbing ang pagka-aproba sa paghimog implementing rules and regulations (IRR) sa bag-ong gi-amendar nga Zoning Ordinance sa konseho sa dakbayan.
Ang Ordinance No. 14, series of 1979, kon ang Comprehensive Land Use Development Plan and Zoning Ordinance, maoy kasamtangang gipatuman ug giimplementar sukad 1979 way labot niini ubang seksyon nga 37 anyos na nga wa pa naamendar.
Matod ni Quisumbing nga ang ordinance no. 14-2016-1119 napasar niadtong Septiyembre 29, 2016 ug gi-amendar niini ang 37 anyos nga comprehensive land use development plan and zoning ordinance aron matubag niini ang panginahanglan sa pag-amuma sa mga luna ug gilakip na sab niini ang disaster risk reduction management (DRRM) and climate change adaptation (CCA).
Ang pag-amendar sa ordinansa kinahanglan untang susihon ug i-update matag 10 ka tuig apan pakyas sa paghimo niini ang dakbayan sud sa tulo ka dekada.
Matod ni City planning and development officer Marlo Ocleasa nga nihimo na sila og preliminary workshop alang sa paghimo sa IRR sa bag-ong gi-amendar nga Zoning Ordinance, diin iyang gipresentar ang lima ka Planned Unit Development Zones (PUD-Zone).
Si Ocleasa niingon nga ang PUD-Zone gihan-ay nga mao ang central business district, industrial, residential, recreation and tourism, ug medium to high intensity industrial development.
Ubos sa ordinansa ang PUD usa ka land development scheme diin ang project site komprehesibong planuhon isip usa ka entidad diin ilakip sa plano ang planning/design, building siting, conformity of building types and land use, usable open spaces and preservation of significant natural land features.
Paambit ni Ocleasa nga ang stratehiya sa paglakip sa concern sa kalikupan sa planning ug pagpalambo nalakip niadto sa unang State of the City Adress (SOCA) ni Quisumbing.