Luzano: Zamboanga... Na-Gubat, Nalayus!

NIA ketdin ti saplit ni pannubok no dumteng. No saan nga aggigiddan…agsisipolda sadanto payla agtutuon kada agkakawil. Dayta ti napasamak iti Zamboanga. No mano nga aldaw nga natadtad daytoy iti bala iti rupak ti gobyerno ken MNLF. Adu dagiti pimmusay. Kimmalma ti kanalbuong ngem adu met dagiti nakalibas a kalaban. In-inut a nagsubli ti linak ken talna. In-inut met a narikna ti biag dagiti residente ken negosyante. Agungar koman ngem bimmasnot manen ti maysa pay a pannubok kadagiti kailliantayo dita. Adda manen dagiti pimmusay ken naawanan ti pagtaengan gapu iti flash floods itay nabiit. Nagsublida manen kadagiti evacuation centers dagiti piman a biktima. Saanen a bala ti sarsarangtenda iti agdama no di ketdi layus. Saludsod: ania ngata ti kaipapanan daytoy a partaan ti Namarsua? Arasaas: madusdusatayo gapu iti basol. Ngem apay kano nga isuda? Nagadu dita a managbasol nangruna kadagiti nagkurakot iti pirak dagiti umili... apay a dida MAKARMA? Kunada: dumtengto ti umno a panawen. Urayentayo.

-o0o-

No dumteng ti malas kunada... narigat a gawidan. Ehemplo: idi pimmusay daydi Dr. Charles Cheng, maysa kadagiti gayyemna unay a padi ti simmaranay ken nangted suporta kadagiti agladladingit a napanawan. Naindaklan a mensahe ti imbatina iti daydi rabii nga inna panagngilin iti masayag. Ket iti aldaw iti pannakaitanem daydi Dr. Cheng, daytoy a padi – ni Fr. Jay Alipio ti mangted-misa sadiay Katedral. Ngem saan a nakagteng gapu ta naitaray iti ospital. Ket kalpasan a naitanem daydi Dr. Cheng... gimluong met ti damag a pimmusay metten daydi Fr. Jay Alipio. Kunada, nia metten a malas. Ngem kuna ti kaadduan... naitani dayta babaen ken ni Apo kas inda panungpalan. Idi kano naipasngaytayo, addan kasingintayo a panungpalan. No kaano ken no kasano... ti Apo laeng ti makaammo. Ti adal: saganaantayo ti masakbayan. Kitaenyo dagiti naalibtak... nasiglatda nga agtakaw iti kaban ti ili tapno makapatakderda kano iti bukodda a musoleo. Ay sorry apo... sabali metten ti nastrekko nga abut. Sanabale... dida pay laeng nakaasideg iti ABUTDA... maur-uramen ti kararuada idiay impierno! Ti inkam pannakipagrikna kadagiti napanawan daydi Fr. Jay Alipio.

-o0o-

Dua a summit ti tinabunuan ni Pres. Noynoy sadiay Indonesia ken Brunei. Ngem nagameran iti kontrobersiya ti kaaddana sadiay Bali. Nabastos kano daytoy babaen iti tallo a taga-media manipud Hongkong. Gapu iti daytoy, napawilan nga ag-cover dagitoy a mediamen iti Apec summit. Nia kadi aya ti rason iti pannakabastos kano ni P-Noy? Impalagip laeng dagiti taga-Hongkong Press group ti napasamak idi a Manila Hostage crisis a nakatayan ti walo a turista manipud Hongkong. Sabagay, di koma met kellaat ti pasamak. Naidalan koma met iti umno a wagas. Ngem ala, iti biang ni P-Noy... paset dayta ti trabahona kas presidente. Baklaymo ti amin a parikut ti pagilian. No agbalinka nga arsagid, dika makadanon iti finish line. Adda pay tallo a tawen iti sirbisyo ti president. Ket sapay koma ta maipatungpalna pay amin nga inna inkarkari kadagiti umili. No aglulok ti tumengna gapu kadagiti agrarapit a parikut... isu laeng ti makatimbang no ania ti pagnana. No nalinteg, ay ket mayat. Ngem no killo... NABARTEK, ESTE, AGSUEK! He he!

-o0o-

Ingetanda kanon ti implimentasyon ti King of the Road Ordinance ti Baguio City. Impaganetget daytoy ni BCPO Chief Col. Jesus Cambay itay nabiit. Mayat apo. Masapul a madisiplinaan dagiti motorist kasta met pedestrians. Ti sagudayen daytoy nga ordinansa a pinutar ni Coun. Bagbagen ket rumbeng nga agsardeng iti lima-segundos dagiti amin a lugan iti sango ti pedestrian lanes. Ngem adda met agkuna: maipatungpal ngata iti likud ti kinapudno nga adu a talaga dagiti PASAWAY a drivers ditoy lokaledad? Surotentayo no adda pagnaan ti ngipen ti linteg. Kidkiddawen ni Col. Cambay ti tulong dagiti umili nga ireportda koma iti kapulisan dagiti aglabsing tapno madusa ida. Sapay koma ta dinton mapasamak dagitay eksena nga arig makabangga iti tao dagiti lugan uray payen kadagiti pedestrian lanes. Kasano met ngay kano dagitay pedestrians nga agtetext pay a bumallasiw a kunam la no kukuadan ti kalsada? Kasanon dagitay ipilitda latta ti bumallasiw uray no naka-go dagiti lugan? Rumbeng met koma a madusa. Adda pay tay sultipan langaruden ti pulis ket kumusilap pay laeng. Bugtakenda pay ti pulis. Haaay ama aya. Only in the Philippines.

-o0o-

Gapu iti panagdardaras, adu dagiti pakaisagudan a pasamak. Adda agdidinnungpar a mangitunda iti riri. Daytoy ti gapuna no apay nga addan nakalanad a KEEP RIGHT LANE kadagiti Pedestrian Lanes ti City Business District. Ngem ti banglesna, no inkay obserbaran... kasla didan sa met ammo ti kayatna a sawen ti Keep Right. Adu latta dagiti agdidinnungpar. Awan met mangiwanwan. Awan met mangsita. Amangan ta mapunaston dagita a letra a Keep Right ngem awan met laeng naitulongna. Nangruna kadagiti ungto ti overpasses... umilet gapu iti agsusungani a pagturongan. Adda pay dinnuron. Adda pay masipdutan iti celfon. Adda pay –MATSANSINGAN... babaen kadagitay UMAAPPOT kada PUMAPAUBET! Rekomendasyon: bantayan koma dagiti otoridad ti implementasyon ti baro nga annuroten. No dida maimplementar... buraenda laengen ta sayang ti gastos ken bannog.

-o0o-

Piman met ti TUWID NA DAAN wenno NALINTEG A DALAN nga inyaplag ni Pres. Noynoy sipud pay nagtugaw a presidente. Ta apay a piman? Adda met kano dagitay pinilina a tattataona ti nakurang ti sirbisyoda. Ti tinnagna... ni P-Noy ti mapabasol. Adda dagiti inpatugawna iti gabinetena tapno katulonganna iti panagsirbina iti ili. Ngem adda met dagiti pimmalpak. Ti napabasol manen... ni P-Noy. Kunada: panawenen tapno agwalis ni P-Noy. No adda dagiti itta wenno riper iti brigada dagiti pilina a nagtalkan... masapulna met tay landok a gemgem a mangmanso kadagitoy. Saan a kumo asideg a gayyem wenno adda utangna a naimbag a nakem. Ditayon aginagan pay. Ngem itay laeng kallabes, saan aya nga adda survey ti SWS a nagkuna a ngimmato ti bilang dagiti awanan trabahona ditoy pagilian. Adda dagiti taona nga inna impuesto tapno mangkita iti daytoy. Ngem apay a kasla awan nagappuananda? Sa ti itudoda nga akimbasol ni manen, P-Noy. Piman met ti president. Isu amin ti agsagrap iti pait idinto ta adda dagiti pinagtalkanna ti AGBUTBUTITIN iti imas ti biagda. Adda sibubussog ti bulsana nga opisyal idinto ta arig MAMIRAUTEN TI BUOK NI P-NOY gaput problema. Nakaam-amak no ti NALINTEG A DALAN ket agbanagto ketdi a LIMTEG A DALAN. Arasaas: Sanabale ta no LUMTEG TA SANGUANAM... BUMSOG TI MATAMAAN! Guray... madin sa ti saadna, he he! Wen gayam, BELATED HAPPY B-DAY apo Mayor MAURICIO DOMOGAN. Apaglabesna laeng kano iti maikatlo a DEBUT. Diakon humirit pay baka MAPULET ti CARDKO. Baboooo! Adios mi amor, chao, mabalos!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph