KAIKUPKUPIN pay laeng ti alingasaw ti SONA ni Pres. Duterte... gimmil-ayaben a kasla kimat ti giyera de lenggua (word war) dagiti dua nga ulo a sigud nga aggayyem ngem ita... arigdan ti kasla aso ken pusa. Nasaktan kano ni CPP founder Joma Sison iti estilo ni Digong a nangibunga iti pannakaisardeng ti peace talk iti baet ti gobyerno ken grupo-CPP-NDF-NPA.
Adu dagiti nararasaw a pannao ti imbasnot ni Digong kas koma iti edad ken estado iti salun-at ni Joma. Lakay kanon ken masakit. No pudno kano a natured... masapul nga agawid (Joma) ta sanguenna dagiti kasona saan nga aglemlemmeng sadiay The Netherlands. Mayat kano ti biagna sadiay idinto ta piman a mamirmiraut kano dagiti taona ditoy Pilipinas. Adu pay dagiti nagagasang a pasagid ken kugsil ni Digong kadagiti naglabas nga aldaw.
***
Gimluong met ti sungbat ni Joma Sison itay nabiit. Ni met Pres. Digong ti binasnutanna. Masakit kano ti presidente ket rumbeng nga agpadoktor para iti utek daytoy. No itimbangtayo dagita a pinnadakes dagiti dua... tonelada pards. Grabe a kasla saan a nakappapati ngem naimutektekantayo a pudno. Arigda kano ti ubbing a di maanawa dagiti dadakkelda. Hayxsh... biag. Adu pay ketdin ti mabuisit. Adda pay nagkuna nga agsangoda la koman a dua uray ania ditan a klase ti ranget wenno gubat tapno malpasen ti tensiyon. Kasano a dika mabuisit ket nagadu dita dagiti aggigiddan a parikut ti pagilian iti agdama. Naka-isa pay laeng ti Martial Law idiay Mindanao. Dipay nalpas ti giyera dita Marawi. Maitultuloy met latta ti giyera kontra droga. Dumegdegdeg met ti parikut dita kustom a ti kaudian ket ti pannakaibutaktak ti P6.4Bilyon a droga a nakalusot manipud China.
Inayonmo pay ti kontrobersiya iti STL-Jueteng. Ultimo Barangay election... dipay nai-pinal no matuloy wenno saan. Maryakowzina... adu dagiti agdama a parikut. No alaem iti pinnudot... awan ti pagtungpalan dagita a parikut. Mabagtitkan kabsat... adda pay laeng dagita a problema a nakamulagat!
***
Itay nabiit... adda manen baro nga eksena. No medyo limmamiis ti Digong Vs. Joma a kontrobersiya... simgiab met ti Digong vs. Noynoy gapu iti giyera kontra droga. Unayen! ‘Nia manen dayta? Kastoy, pards... adda ngamin nasao wenno padaplis ni sigud a Presidente Benigno “Noynoy” Aquino III panggep iti kampanya kontra illegal a droga. Kasla ngamin kano awan met nagbaliwan ti pagilian uray adda ti kampanya kano ni Pres. Duterte kontra droga. Natural, arigna iti kugtar iti rupa ni Pres. Duterte ti daplis ni Noynoy. Isu nga iti panagbitlana iti maika-113 nga anibersaryo ti BIR itay nabiit... kinuna ni Duterte a di koma agbiddut a sumrek iti illegal a drug trade ni Aquino ta no saan ket PATGEDANNA. Iti ungetna... kinuna ti presidente nga adda dagiti heneral nga aide kano ni Aquino ken uray ti naabak a kimmandidato a presidente iti sibayna ti konektado kano iti illegal a drug trade. Innagananna pay dagiti kano “bata” ni Noynoy kas kenni retirado a Heneral ken agdama a mayor ti Bantayan, Cebu a ni Mayor Vicente Loot ket konektado iti illegal a droga. “Sabi ni P-Noy parang walang nangyari. Sige, pumasok ka sa droga, P-noy pag hindi kita pinutulan ng ulo, buang ka. Anong walang nangyari? Mga heneral mo noon, yang aide mo, aide ni Roxas puro nasa droga konektado. Number 1 riyan yung bata niyo si Gen. Loot. Aywan ko kung nandito si Loot, Put... huwag mo akong takut-takutin, general ka.” Dagita dagiti putedputed a basnot ni Digong. Pammaneknek a nasaktan iti panangtagibassit ni Noynoy iti nagappuananen ti Duterte Administration kontra illegal a droga.
Kinapudnona... no intay lagipen dagiti ballaag ti presidente... maysa kadagiti innagananna a persona a konektado iti droga ket ni daydi Ozamiz City Mayor Reynaldo Parojinog, Sr. Iti maysa a raid dagiti otoridad... napapatay daytoy agraman asawana ken 13-pay a dadduma. Ti makagapu... droga ken armas. Pammaneknek dayta a pasamak nga agtultuloy latta ti kampanya ti administrasyon kontrra illegal a droga.
***
Kinapudnona... bayat kadagiti maisaysayangkat nga imbestigasyon iti pannakapapatay ni Mayor Parojinog ken kakaduana... bimmasnot met ni PNP Chief Dir. Gen. Ronald dela Rosa nga adda pay kano dagiti sumarsaruno a maitumba manipud iti grupo dagiti drug lord ken narco-politician kadagiti sumarsaruno pay nga operasyon ti pulisya. “Marami pa, hintay-hintay lang kayo... that should serve as a warning to everyone”. Nadagsen dayta a ballaag ni Bato. Iti agdama, kas kinunana... manarimaanen ti “case build-up” kontra kadagiti narco-politicians a siguden nga innaganan idi ni Digong. “Nationawide scale yun, marami pa!” innayon pay ni Bato. No intay lagipen..itay laeng nabiit... sakbay iti operasyon kontra Parojinog... napapatay ti mataap a drug lord sadiay Iloilo a ni Melvin Odicta ken ti asawana a ni Meriam. Napapatay dagitoy kalpasan a nakisaritada kenni Dela Rosa idiay Camp Crame idi napan a tawen gapu iti pannakairamanda iti listaan dagiti konektado iti droga. Idi maamad kenni Bato no apay a napapatay ni Mayor Parojinog... adtoy ti sungbat ni Heneral: “I want him alive, to answer the charges, pero kung lumaban siya then I want my men alive more than him pag siya lumaban. After the smoke has cleared, it should be the good man standing and the bad man lying on the pavement.” Iti dayta a raid, nakasamsam dagiti otoridad iti armas, granada, maatap a shabu ken dadduma pay. Dagita nga eksena ket maysa pay a pammaneknek nga adayo pay ti ungto ti kampanya ti administrasyon kontra droga.
***
Analysis: idi katibok ti panangrugi ti Oplan Tokhang... adu dagiti nainaganan (adu met ti saan) nga indibiduwal ken grupo ti adda iti listaan nga eggem ni Pres. Duterte. Manipud barangay officials nga agpangato. Uray iti showbiz, adda dagiti nairaman ti naganda iti listaan. Ayandan dagita a nakalista? Natokhang amin ngata dagita? Apay a kasla limmamiis? Agtultuloy ngata a maim-imbestigaran dagita? Maysa a burburtia iti agdama ti estilo ti kampanya ti administrasyon kontra droga. Dayta ngata ti makagapu no apay kasla adda dagiti saan a kuntento... maysa ditan ni Ex-Pres. Benigno Aquino? Iti pannakaisursurat daytoy nga espasyo, agur-uraykami pay laeng iti reaksiyon wenno sungbat a basnot met manipud kenni Noynoy. Masiguromi a nakangursiit man ni Noynoy kadagiti nasasakit a daplis ni Digong kenkuana... nasaktan daytoy ken mabalin a mangisagsagana met iti isaplitna a kontra-banat kenni ni Pres. Duterte.
Tsk tsk... no sibibiag daydi lolok... sangatonelada a kantiyaw ti ipugsitna kontra kada Digong ken Noynoy. Agasem ket dua a presidente... agpinpinnalapaldan gapu iti droga? kadi a kasla nakababain? Only in the Philippines, pards! He he... ne, awan espasyon. Adios mi amor, ciao, mabalos!