KUMUSTA mga suki? Human sa pila ka adlaw nga way trabaho, siguradong naka-recharge na ang tanan.
Balik na sad ta sa realidad, sa inadlaw-adlaw natong pagpanikaysikay, hasta sa paghimo og kasal-anan.
Ah, mao nay dakong hagit karong nabanhaw na ang Ginoo nga unta dili na ta makasa og dako.
Apan grabe ang showbiz no kay bisan Huwebes Santo ug Biyernes Santo, bakasyon grande pa more!
Maayo ang Kapuso actor nga si Alden Richards kay nipauli gyud gikan sa Dakak kay mao kunoy ilang namat-an sa ilang lola nga basta Biyernes Santo dapat naa ra sila sa balay.
Pabaya?
Ang sikat nga brodkaster nga si Karen Davila gitugtan ang anak nga mag-surfing niadtong Biyernes Santo sa isla sa Siargao.
Paglabay sa 30 minutos, nibalik ang iyang anak nga nagkadugo na. Nagyawyaw si Davila sa iyang Facebook tungod sa kakuwang sa first aid ug medical personnel sa maong lugar.
Apan dunay mga Netizen ang nitawag ni Davila nga OA kay naa ba gud kunoy hospital diha nga naa man sila sa bukid sa Siargao.
Naa say punto ang comment nga minor pa ang iyang anak, maorag 15 anyos lang, ug duna pa’y autism, ngano iya ra man kunong gisalig sa mga local trainer? Bitaw, labi pa nga first-timer lang ang iyang anak sa surfing.
Nisimba
Huwebes Santo, puwerte sad ngaab sa beauty queen-turned-actress nga si Bianca Manalo human nitikyaub ang gisakyan nilang speed boat kauban ang iyang boyfriend nga si Antique Mayor Jonathan Tan.
Pagka-ugma, nihatag og update ang iyang manager sa kaulohan nga nisimba na kuno si Bianca apan sige pa gihapon og hilak.
Niadtong bata pa ko, kasab-an ko sa akong mama basta magkurikuri ug magsabasaba basta padung na mamatay ang Ginoo. Pero karon, maorag lahi na gyud ang panahon.
Pirated
Naa say mga pirated DVD sa Jesus of Nazareth, pero ang sulod di diay mao.
Ang nakabutang sa cover kay starring Robert Powell and directed by Franco Zeffirelli.
Pagtan-aw nako sa balay, lahi ang gadala. Dili Jesus of Nazareth. Pastilan.
Da best?
Nakakita na mo sa pelikula nilang Nadine Lustre ug James Reid nga “Never Not Love You”? Showing na ni niadtong Sabado.
Wa pa ko kita pero daghan ang niingon nga acting-wise, mao kuno ni da best sa Jadine.
Nindot tingali kay Graded A man sa Cinema Evaluation Board. Sige, manan-aw ta! Now na!