Mabdos nga taga Cebu ikaduhang kaso sa Zika sa CV
USA ka 32-anyos nga mabdos ang ikaduhang kompirmado nga kaso sa Zika Virus sa Central Visayas, diin anaa sa dakbayan sa Sugbo.
Lakip ang maong tulo ka buwan nga mabdos sa pito ka mga mabdos sa 57 ka kaso sa Zika lukop nasod.
Sa official website sa Department of Health, 38 ka mga babaye samtang 19 ka lalake ang biktima sa Zika diin 59-anyos ang labing edaran niini.
Matod ni Dr. Van Phillip Baton, regional medical program coordinator for infectious diseases sa DOH 7 nga Enero 18 dihang nakompirmar ang ikaduhang kaso sa Central Visayas.
Gibutyag usab ni Baton nga niadtong Martes, Pebrero 7 dihang nanganak ang 22-anyos nga unang kompirmado nga Zika victim sa Cebu.
Wala’y microcephaly o paggamay sa ulo ang nakita sa bata dihang gihimugso, maoy pahibawo ni Baton.
Sa pagkakaron, padayon ang ilang monitoring sa 32-anyos nga mabdos.
Gipahibawo usab ni Baton nga parehong gikan sa lamok nga Aedes ang virus sa dengue, zika ug chikungunya.
Usa ang rashes nga makita sa sintomas sa Zika bisan og wala o aduna’y kasinatian o gihilantan kini.
Malikayan kini nga mga sakit pinaagi sa 4S nga kampanya sa DOH o ang search and destroy sa mga breeding places sa lamok, self-protection susama sa paggamit og insect repellent ug mosquito nets sa pagkatulog.
Konsulta dayon sa mga hilanat nga molapas sa duha ka adlaw ug say yes sa fogging kon naay outbreak sa lugar.