ANG maanindot ug talagsaon nga disenyo ug dekorasyon sa motorela (entry #1) ni Elma Abao, taga-Barra, barangay Macabalan ning dakbayan, ang naka-agni sa panel og judges aron mahimong grand winner sa bag-ohay natapos nga “Paskorela 2016” kon “Dress Up Your Motorela Contest,” diin P40 mil pesos plus trophy ang nadawat sa champion.
Ang ikaduhang ganti nga P25 mil pesos plus trophy naangkon ni Carmen Abao sa barangay Carmen, samtang ang ikatulong ganti nga P15 mil pesos plus trophy nakuha ni Celso Pagumpana sa La Paz 2, Kolambog, Lapasan.
Ang siyam ka non-winners nakadawat gihapon og tag-P2 mil pesos matag usa isip consolation prizes.
Kahinumduman nga nasaksihan sa publiko ang pagparada sa 12 ka motorela nga giadornohan sa dekorasyon sa pasko gikan Rodelsa Circle padulong sa Divisoria niadtong Sabado sa hapon, Disyembre 10, alayon sa “Pasko de Oro 2016.”
Ang “Paskorela” usa ka tinuig nga kompetisyon, ug kabahin sa “Pasko de Oro 2016” nga gipangulohan ni Eileen San Juan, ug gisuportahan sa City Tourism and Cultural Affairs Office ubos ni Acting City Tourism Officer Elmer Wabe ug City Tourism Council ubos ni Chairperson Dorothy Jean Pabayo. (CIO)