COTABATO CITY -- Mag-amahan nga nakigpinusilay sa mga miyembro sa Citizen Armed Forces Geographical Unit (Cafgu) napatay alas 10:20 sa buntag niadtong Martes.
Nahitabo ang insidente didto sa Barangay Kigan, South Upi, sa probinsiya sa Maguindanao.
Giila ang mga napatay nga sila si Lauriano Adolfo ug iyang anak nga si Atoy samtang naangol sab si Joseph Adolfo, mga molupyo sa Barangay Kigan South Upi.
Gikanayon ni Maguindanao Provincial Police Office Director Agustin Tello nga gipasidan-an sa mga miyembro sa Cafgu ang mag-amahan nga dili magdala og armas kung moadto sila sa mga pista ug ubang okasyon.
Apan nasuko ang mag-amahan ug gipabuthan ang outpost sa Cafgu, hinungdan nga napugos sila sa pagbalos ug nakigpinusilay.
Patay gilayon ang mag-amahan samtang si Joseph nasamdan.
Apan ang pamilya sa mga biktima miingon nga dili engkuwentro ang nahitabo apan gibanhigan sila sa mga Cafgu nga gigamit sab sa usa ka politiko.
Mag-amahan giingong kanhi mga sundalo, hinungdan nga dunay mga armas ug sakop sa Reform Ilaga Movement.
Kapulisan sa South Upi padayon nga nag-imbestiga kalabutan sa maong hitabo samtang nagdugang og puwersa ang militar sa posibleng pagbalos sa pamilya sa mga biktima. (Edgar E. Fuerzas)