EXTREME sports.
Di pa kaayo seguro mainstream ang klase sa paugnat sa kusog apan motuo man mo o di, kusog kaayo ang gamit niini sa Sugbo.
Usa sa daling mahurot kining mga gamit alang sa wakeboarding.
Kon tan-awon nimo ang wakeboarding, di siya sayon buhaton apan nahibawo ka ba nga mamahimo ka nga makasinati niini dinhi ra usab sa Sugbo?
Adunay duha ka mga wake park sa Sugbo, pareho nga anaa sa amihanang bahin, ang usa anaa sa lungsod sa Liloan ug ang usa anaa sa siyudad sa Danao.
Kon ganahan ka sa matang nga extreme sports anaa ra ang gears niini kon ang gamit sa mga wake park apan kon gusto ka mopalit, gibisita sa Sun.Star Superbalita ang usa sa mga tindahan sa Sugbo aron sutaon kon unsa nga mga gamit ang gikinahanglan ug kon tagpila kini.
Ang “Stride and Stroke” nga anaa mahimutang sa 3rd level sa Ayala Center Cebu naninda og mga gamit sa wakeboarding diin makita ang nagkadaiyang brand ingon man ang style niini.
Apan, di mamahimo nga mag-wakeboarding kon way wakeboard diin nagkantidad og P14,000 ngadto sa dul-an P20,000 ang Body Glove nga brand sa wakeboard sa tindahan.
Nasuta usab ning mantalaan nga adunay tulo ka klase sa wakeboard, usa niini ang splat alang sa mga gagmay, ang crux kun alang sa mga trick ug ang antix kon ganahan lang nga magpaguyod.
Ang manager sa tindahan nibutyag nga kusog ang wakeboard tungod kay itandi sa ubang tindahan mas affordable ang ilang presyo.
Usa sa gikinahanglan kon mag-wakeboarding mao ang impact vest aron maprotektahan ang lawas sa hapak sa tubig, nagkantidad og P4,980 ang impact vest diin gamit usab kini isip pagpanalipod sa impact sa lawas sa panahon nga matagak ka.
Ang usa sa labing importante mao ang helmet diin Bern ang brand niini ug nagkantidad usab og P3,950.
Giingon nga di lang Pinoy ang himalitan sa mga gamit apan adunay langyaw usab ang mopalit sa ilang tindahan.
Gawas sa mga gears, adunay boardshorts, trunks, shirts, rash guards, snorkeling gears, diving gears ug uban pa ang mapalit sa tindahan.