Magtiayon giabsuwelto sa korte

GIABSUWELTO sa korte sa kasong qualified trafficking ang magtiayon nga gipasanginlang mga bugaw. Ang International Justice Mission nasagmuyo sa desisyon apan mas mopalig-on pa sila sa mga ebidensya sa uban pang mga kaso aron di basta mabasura.

Naghinilakay ang magtiayong Ricardo ug Myrna Ramos human basaha ang walo ka pahina nga hukom ni Cebu City Regional Trial Branch 818 Judge Gilbert Moises nga nagpalingkawas kanila gikan sa kaso.

Ang magtiayong Ramos giakusahang nibugaw sa usa ka 16 anyos nga babaye sa Brgy. Kamagayan.

Ang magtiayong Ramos nadakpan sa usa ka entrapment operation sa City Intelligence Branch sa Cebu City Police Office (CCPO) niadtong Abril 2011 human gibugaw sa nagpailang kustomer ang 16-anyos nga babaye, nga si alyas Apple.

Si Apple nag-abang sa balay sa magtiayon.

Sa desisyon ni Moises, iyang gitumbok nga wa makapresentar og igong ebidensiya ang prosekusyon, subay sa gialegar nga krimen.

Tungod sa kahuyang sa ebidensiya, gitugutan sa korte nga makapiyansa og tag P200,000 ang mga akusado niadtong 2013 bisan kon non-bailable ang kasong ilang gi-atubang.

Gihimug-atan sab sa huwes sa iyang hukom ang pag-angkon sa biktima nga namakak lang siya sa iyang affidavit.

Gihangop sa abogado sa mga Ramos nga si Salvador Solima ang desisyon sa korte.

Matod niya nga inosente ang iyang mga kliyente ug biktima sila sa minao-mao nga kaso sa IJM ug sa mga pulis.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph