KIDAPAWAN CITY -- Samaran ang magtiayon human nagduwelo og kutsilyo, alas 2:15 sa hapon niadtong Biyernes, Hulyo 7.
Giila ang mga biktima nga sila Heginio Salmeron Lumocso, 44, ug iyang asawa nga si Liza Lazarte Lumocso, 43, mga molupyo sa Barangay Tomado, Aleosan, North Cotabato.
Sumala ni Aleosan Chief of Police Senior Inspector Edwin Abantes nga nagkalalis ang magtiayon gumikan sa personal nga problema sa pamilya.
Gusto sa bana nga ipabasura ang kaso nga kalapasan sa Republic Act 9262 o Violence against Women and Children nga gisang-at sa iyang asawa.
Apan nagmagahi si Liza sa hangyo ni Heginio nga misampot sa grabeng binayloay og mga mahait nga pulong.
Wala maka-aguwanta ang bana sa sobrang kasuko, gidunggab ang asawa. Apan ang asawa nakapunit sab og kutsilyo hinungdan nga nagduwelo sila sa kutsilyo.
Maayo na lamang kay naabtan sa ilang mga anak ang magtiayon ug nadala dayon ngadto sa Aleosan District Hospital ug anaa karon sa talandugong kahimtang.
Kapulisan sa Aleosan Municipal Police Station padayon nga nagsusi sa hitabo samtang gisuwat ning balita.