HOST ang dakbayan sa Mandaue sa ikaupat nga International River Summit (IRS) sunod tuig.
Atol sa sesyon sa konseho kagahapon, gitugtan sa Konseho sa dakbayan si Mayor Luigi Quisumbing nga mosud og usa ka memorandum of understanding and cooperation tali sa Department of Environment and Natural Resources ug League of Cities of the Philippines alang sa pagpahigayon sa summit diin ang mga expert sa watershed management ug practitioners mobisita sa dakbayan.
Matod ni Konsehal Carmelino Del Mar, kinsa maoy chairman sa komitiba sa pagprotiher sa kalikupan, nga ang Mandaue usa ka miyembro sa Central Cebu River Basins Management Council pinaagi sa usa ka memorandum of cooperation.
Dugang ni Del Mar nga di mominos sa 500 ka mga partisipante sa tibuok nasud ug abroad ang mosalmot sa kalihukan nga gipangulohan sa League of Cities in the Philippines (LCP).
Nasuta ning mantalaan nga tuyo sa summit nga matapok ang mga dagkong stakeholders sa pagprotiher ug rehabilitasyon sa mga sapa sa nasud.
Giila ang panginahanglan sa pag-rehabilitate, pagpalambo, pagmaneho, ug pagprotehir sa natural resources nga anaa sa Central Cebu River Basins Management Council base sa Department Administrative Order No. 92-30-1992.
Ang unang summit kalabot niini gihimo sa Iloilo, Marikina ug ang ikatulo sa Cagayan de Oro.