GIPANGANAK na ni Davao City Mayor Inday Sara Duterte-Carpio ang himsog nga batang lalaki nga iyang ginganlan og Stonefish.
Si Duterte-Carpio, alas 12:56 sa hapon Huwebes, Marso 2, nanganak sa bata nga dunay gibug-aton nga 2.42 kilos o 5.3 pounds, pinaagi sa cesarean.
Sa hulagway sa Instagram nga gipaskin ni Vice Mayor Paolo Duterte, nagpakita sa malipayon nga panagway ni Lawyer Manases Carpio, bana sa mayor.
“Congratulatons Inday and Mans! Hello Stonefish,” suma ni Vice Mayor Duterte.
Samtang, si lawyer Carpio sa usa ka pahayag nga gipaguwa sa Davao City Information Office nagpasalamat sa Ginoo sa luwas nga pagkatawo sa ilang ikatulong anak.
“Thank you, Lord, for the gift of life,” suma sa bana sa mayor, kinsa nagsulti nga maayo ang kahimtang sa asawa.
Si Stonefish maoy ika-tulo nga anak sa magtiayon, ang kamagwangan mao si Mikhaila Maria, gianggaan og Sharky, 8, ug Matteo Lucas, gianggaan nga Stingray, 4.
Si Presidential Spokesperson Ernie Abella nagsulti nga si Presidente Rodrigo Duterte nalipay nga natawo na iyang apo.
“The President is delighted with the arrival of his newest apo, and he is glad that both Mayor Inday Sara and Stonefish are healthy and stable," suma niya.