GIAWHAG sa Metro Cebu Development and Coordinating Board (MCDCB) ang Department of Public Works and Highways (DPWH) ug ang pribado nga consultancy firm nga ilakip sa flood control and drainage master plan study ang epekto nga mahatag niini ngadto sa mga informal settler.
Atol sa 4th quarterly meeting sa MCDCB sa bag-ong city hall sa dakbayan sa Carcar kagahapon, usa sa pangutana sa board members kon asa na ingon man pila ang kantidad sa mga informal settlers nga apektado na unya sa pagpalapad sa sapa ug paghimo og dako nga drainage.
Si Andre-Paul Ampong, hydrologist and drainage engineer sa Woodfields Engineering Company sa presentasyon niini sa board sa update kabahin sa naasoyng master plan, nibutyag kini nga maabot og kapin P33 bilyones ang kantidad sa pagsulbad sa problema sa baha sa tibuok Metro Cebu.
Apan ang kantidad, wa kini naglakip sa kantidad alang sa relocation sa informal settlers.
Base sa pagtuon sa kompaniya, lakip sa priority nga sapa nga kinahanglan nga palapdan naglakip sa Lahug, Subangdaku o Mahiga Creek, Tejero, Kinalumsan, Bulacao, Guadalupe ug Tipolo.
Moabot sa P731 milyones ang kinahanglan nga pundo aron mapalapad ang sapa aron usab makaagi ang tubig ug mao kini ang nakita nila nga tubag sa pagbaha sa dakbayan sa Sugbo ug Mandaue.
Nag-unang rason sa pagbaha sa Metro Cebu ang kahagip-ot sa mga sapa, problema sa drainage ug ang wa gi-regulate nga mga tubig nga nidagayday niini.
Giisip nga moabot ngadto sa 31.70 ka kilometro ang kadaot unya sa baha sa Metro Cebu kon di kini masulbad.
Giklaro hinuon ni Ampong nga matino nila ang mga lugar nga adunay informal settler ug kon angay ba kini i-relocate apan ang makasuta sa kantidad kon pila ang gastuhan niini lakip na ang relocation sites sa naasoyng lokal nga kagamhanan kon diin kini nga lugar.
Si Atty. Brandon Raya, chief legal officer sa DPWH 7, nagkanayon nga usa sa problema nila sa ilang ahensiya kon kalambuan ug proyekto na ang pagahisgutan kining writ of possession tungod kay dugay kini madesisyonan sa korte.
Matod ni Raya nga moabot ngadto sa duha ngadto sa tulo ka tuig ang desisyon sa korte kabahin niini.
Gitug-an usab nila nga hagit usab nila kining suporta gikan sa LGUs tungod kay sila mao ang motabang sa mga apektado nga residente.