(Pasiuna: Kini ang atong apas-sumpay sa pangutana nga gipadangat kanato ni Connie, the Scorpion Girl kung ang mga kosmetiko nga gitatakan og "hypoallergenic" mas maayo kaysa niadtong walay tatak niini.)
Dear Connie, the Scorpion Girl,
Ug karon sa atong pagpadayon sa atong pagtubag sa imong pangutana. Sa niagi atong gihisgutan ang mahitungod sa mga regulasyon sa mga pagtatak niining termino nga "hypoallergenic" niadtong mga produkto nga niagi sa mga pag- testing. Ug sa paghimo sa maong mga gikinahanglan nga mga pag-testing, ang mga nagahimo sa maong mga produkto ang responsable.
Apan, ang problema kay ang maong balaod, gideklarar nga walay bale didto sa korte sa Estados Unidos. Mao nga libre na kaayo ang mga nagahimo sa maong mga produkto ug maskin unsa ang ilang itatak base sa ilang gusto. Maayo lang unta ug di mamutbot ba, para lang mahalin ang ilang mga produkto.
Ang opisina sa FDA nag-ingon nga ang mga sangkap nga ginagamit sa mga produkto sa kosmetiko susama lamang gihapon sa tibuok nga industriya. Sa mga niaging dekada, ang mga isog nga mga sangkap usahay nga ginagamit ug usahay usab mohatag kini og problema nga reaksiyon sa ubang mga tawo. Ug maskin pa man nga kulang ang mga pagtuon nga nagpakita nga adunay mga piho nga mga produkto o klase sa mga produkto nga mohatag og reaksiyon sa panit, gamay lang man gihapon gyud ang mga produkto nga mohatag og reaksiyon diha sa panit.
Kini nagpasabot lamang nga ang termino nga "hypoallergenic" gamay lamang gayud kaayo siya ug pulos ug ginagamit lamang nga instrumento sa pagbaligya sa produkto diha sa merkado. Imposible baya nga magarantiya nga ang usa ka produkto sa kosmetiko ug sa pag-alima sa panit dili gayud mohatag og reaksiyon sa alerdyi. Tungod kay ang FDA nagapanginahanglan og mga sangkap sa kosmetiko nga ilista sa label sa produkto, ang mga naga konsumo nga adunay alerdyi o problema sa piho nga sangkap mamahimo nga likayan na lamang nga paliton ang maong produkto nga anaa sa label nga basahon.
Mao nga maskin og walay tatak nga "hypoallergenic," wala nagpasabot nga menos ang kalidad niini kung ikumpara niadtong adunay tatak "hypoallergenic". Kasagaran baya gyud kung naay tatak nga "hypoallergenic", mahal. Pero, kung mahimutang ka anang mahala nga walay saktong kaseguruhan, anaa ra nimo. Good luck!
Dr. Fritz
(Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor sa iyang libro nga “Healthy is Sexy Secrets ni Dr. Fritz”. Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o Sunstar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!)