(Pasiuna: Kini ang atong sumpay sa suliran nga gipadangat kanato ni Reina of Ecoland mahitungod sa mga pagkaon nga gusto niya nga mahibal an nga mopakgang sa bato sa renyon.)
Dear Reina of Ecoland,
Ug karon sa atong pagpadayon sa pag-atubang sa imong sitwasyon mahitungod niining mga pagkaon nga makatabang kanimo nga mapakgang kining problema sa mga bato sa renyon, ang mga pagtuon nagpakita nga ang Dietary Approaches to Stop Hypertension (DASH) diet makatabang nga makapakubos sa risgo sa mga bato sa renyon.
Ang DASH diet usa ka diyeta nga naga tutok lamang sa mga tanom nga bahandi anon sa prutas ug mga gulay, mani, nga adunay kubos nga taba ug walay taba nga gatas, mga karne nga walay taba, isda, manok ug kasagaran gayud nga whole grains, susama sa Barley, Brown rice, Buckwheat, Oatmeal, Popcorn, Whole-wheat bread, pasta or crackers.
Ilakip usab diri ang mga taba nga maayo sa kasing-kasing susama sa mga mosunod nga mga pagkaon:
1. Mga isda nga hataas sa omega-3, susama sa salmon, tuna, pirit, ug bangsi.
2. Usa ka hakop sa mga maayo nga mga mani susama sa almendra o walnut nga makapatagbaw sa kagutom ug makatabang sa kasing-kasing.
3. Mga berries, susama sa mga strawberry ug bugnay.
4. Oatmeal
5. Mga beans susama sa kidney ug black beans.
6. Upat ka onsa sa puwa nga bino (hangtud sa walo ka onsa sa mga lalaki ug upat lamang ka onsa sa mga babaye kada adlaw) makatabang sa maayo nga nibel sa kolesterol sa lawas.
7. Gihulom nga tokwa nga gisagol sa ginisa nga presko nga gulay.
8. Pula, yellow ug orange nga mga gulay susama sa carrots, kamote.
9. Kulitis
10. Mga prutas nga susama sa orange ug papaya.
11. Asparagus.
12. Kamatis.
13. Itom nga tsokolate.
14. Broccoli.
Ang mga pagtuon usab nagpakita nga ang pagkatambok makapausbaw sa risgo sa bato sa renyon.
Karon, ang klase ba sa bato sa renyon makaapekto sa mga pagkaon nga imong angay nga pilion? Ang tubag. Oo. Mao nga kung aduna ka nay bato, pangutan-a ang imong doctor, kung unsa nga klase ang bato sa imong renyon. Kay base niini, mamahimo nimo nga mapakgang ang bato sa renyon pinaagi sa pagbag o sa kung unsa kadaghanon ang imong asin, protein nga gikan sa hayop, calcium ug oxalates diha sa pagkaon nimo.
Apan, tungod kay taas taas pa man gihapon ang atong pagahisgutan mahitungod niining imong sitwasyon, tugoti na usab ako nga ato kini nga padayunon ug pagtuki sa mga sunod nga edisyon niining atong patik. Hangtud na usab sa sunod!
Dr. Fritz
(Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor sa iyang libro nga Healthy is Sexy Secrets ni Dr. Fritz. Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o Sunstar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!)