(Pasiuna: Kini ang atong apas sumpay sa suliran nga gipadangat kanato ni Rich mahitungod sa iyang kapikas nga adunay nang gawas sa kinatawo niini)
DEAR Rich,
Ug karon sa atong pagpadayon. Sa akong giingon sa niagi, mamahimo nga ang rason niining sakita, mao ang pagkawala sa balanse sa sistema sa sulod sa lawas, ug kini mamahimong mahitabo tungod sa mosunod:
1. Antibayotik - ipakubos niini ang kantidad sa lactobacillus, o ang maayong kagaw sa kinatawo diha sa kinatawo;
2. Pagmabdos;
3. Dili ma kontrolar nga diabetes;
4. Hinay nga resistensya sa lawas;
5. Dili maayo nga pamatasan sa pagkaon, nga sige ug kaon ug mga pagkaon nga tam is;
6. Pagkawala sa balanse sa hormones kay nagkaduol na ang pag regla;
7. Stress;
8. Kakulang sa tulog.
Mao nga sa imong pangutana, kung aduna ba kini kahilambigitan sa iyang ginainom nga pildoras sa una, wala katoy labot. Mamahimo siguro kung karon ni niya gina inom -- tungod sa pagkawala sa balanse sa hormones sa lawas. Apan, kung sa una pa to -- nga niadto pa nga tuig sa 2012 -- dugay na nga gilabay to sa lawas ang maong tambal. Mao nga dili na kini mohatag og epekto human sa upat ka tuig.
Kining gibati sa imong kapikas, mao gayud kini ang hulagway sa mga sintomas nga ginahatud niining maong sakita nga nilakip sa mosunod:
1. Pagkakatol sa kinatawo;
2. Daw hapdos;
3. Dako o gamay nga kantidad nga nigula sa kinatawo, nga kasagaran daw puti nga hugawon ug baga - maskin pa adunay mga panahon nga ang moguwa daw tubigon. Mao nga ni ingon ka nga ang niguwa sa imong partner, daw bear brand powder nga nagtibugol nga na basa ug gamay nga tubig;
4. Sakit sa panahon sa sex - nga mao gayud ang usa sa naghatag kanimo ug kahingawa;
5. Pagpuwa puwa sa kinatawo;
6. Pagkasakit sa kinatawo.
Apan, aron masiguro gayud kung ensakto ba gayud ning akong huna huna sa sitwasyon sa imong kapikas, mas maayo kung makigkita ka sa imong doktor o sa usa ka OB-Gyne aron ma klaro gayud pinaagi sa personal nga eksaminasyon ang sitwasyon sa imong kapikas.
Apan, tungod kay taas taas pa gihapon ang atong pagahisgutan mahitungod niining imong sitwasyon, tugoti na usab ako nga ato kini nga padayunon ug pagtuki sa mga sunod nga edisyon niining atong patik. Hangtud na usab sa sunod!
Dr. Fritz
(Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor sa iyang libro nga "Healthy is Sexy Secrets ni Dr. Fritz". Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o Sun.Star-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!)