BUAK ang ulo sa trabahante sa usa ka dakong mall ning siyudad human nga nabanggaan sa pribadong sakyanan kagahapon sa buntag diha sa Corrales Street ning siyudad sa Cagayan de Oro.
Patay ang biktima nga nailang si Raymund Soriano, 29, aduna’y kaipon ug lumulupyo sa Barangay 25 ning siyudad kinsa usa ka merchandiser sa Gaisano Suki Club ug paingon sa trabaho niadtong tungora.
Nagmaneho kining biktima sa Honda XRM nga nagdala sa numero sa plaka nga KC-26307 apan nabanggaan kini sa Toyota Fortuner nga gimaneho ni Ronito Vicente, 47, residente sa Kiburiao, Quezon, Bukidnon.
Samtang laing motorsiklo ang nalambigit sa maong aksidente kinsa nailang si Reignier James Sia, 26, giingong una matud pa nga nabanggaan ni Soriano hinungdan usab nga natumba kini ug nakaangkon og mga pangos sa nagkadaiyang parte nga lawas.
Sa pakighinabi sa SunStar Superbalita ngadto kang Sia kinsa nagmaneho sa motorsiklo nga Honda Supremo nga nagdala sa temporaryo nga numero sa plaka nga 1001-2050 mibutyag nga paingon pud unta kini sa Cogon aron sa pagpangompra og itlog.
“Paingon ko’g Cogon ako’y gauna sa motor sa biktima, ang katong biktima kusog iyang dagan mao’y nibangga sa akoa, mao una ko nalagpot diri sa tunga, ang kato dayong motor mao to’ng nibangga sa akoa kibale didto siya nakapaingon sa Fortuner kay ang Fortuner amo man natabo,” saysay niini.
Gibutyag usab ni Rey Maglunsod, 40 kinsa mao’y nanag-iya sa Fortuner nga hinay lang matud pa padagan sa iyang drayber apan ang biktima nga si Soriano ang nibangga sa ilang sakyanan human nalagpot paingon sa ilang direksiyon hinungdan sa maong aksidente.
Nasayran nga ni-anhi matud pa kini sa siyudad kay death anniversary sa iyang uyoan.
“Padulong mi’g Kauswagan gikan mi’g Cogon, nakita gyud namo tulo ka motor naglakag, kanang naa sa tunga mao na’y nadala sa ospital kay kanang tunga mao na’y nisingki sa motor, iyang nasingkian, naabante tong motor mao to sa amo nakabanda nalagpot,” pahayag ni Maglunsod.
Gidugang pa usab ni Vicente nga ang biktima ang nibangga sa iyang lubot nga bahin sa sakyanan hinungdan nga nakabangga sa maong gimaneho niini ug nasukamod sa kalsada.
“Sila ma’y ni side swipe sa akong lubot mao nabagnos sa kalsada,” sulti ni Vicente.
Dali pa nga gidala sa Northern Mindanao Medical Center (NMMC) ning siyudad si Soriano apan nakabsan kini sa kinabuhi human nakaangkon og grabe nga samad sa iyang ulo.
rGikabutyag nga misulay sa pag-over take si Soriano sa gimaneho ni Sia hinungdan nga nabangga kini sa may tambutso sa motorsiklo nga gimaneho ni Sia diin miresulta sa pagkatumba niini.
Natumba usab si Soriano ug nibangga sa nakatagbo nga Fortuner ug nahapak sa kalsada diin miresulta sa hinanali niini nga kamatayon.
Sa pagsulat niini nga balita ang maong patay nga lawas ang gi-atiman na sa nahabiling pamilya samtang padayon pa ang kapolisan ug imbestigar sa maong aksidente.