GIPANAWAGAN karon nga ipatahan ang mga magtutudlo nga nalambigit sa ginadili nga droga human duha ka mga maestro ang nasikop sa drug bust niadtong niaging adlaw.
Kini ang panawagan ni Cagayan de Oro Assistant City Division Superintendent Rey Manuel ngadto sa mga magtutudlo nga nalambigit sa ginadili nga droga.
Matud ni Manuel nga kon mahimo mosurender na lamang tungod kay andam silang motabang aron mabalik ang moralidad ug marehabilitar.
“Ato silang tabangan nga ma-rehab ug mabalik ang moral,” matud ni Manuel.
Kini nga pamahayag migawas human sa pagkasikop sa duha ka magtutudlo sa kapolisan sa Police Station 8 sa Lumbia human nasapon sa drug bust.
Ang mga dinakpan naila nga sila si Velijun Perez, 36, ulitawo ug Alex dela Vega, 39, ulitawo, taga Zone 9, Macanhan ning dakbayan ug nagtudlo sa tunghaan pampubliko sa Barangay Carmen ning dakbayan.
Giangkon ni Manuel nga wala silay memorandum nga mag-require sa magtutudlo nga magpa drug test ug boluntaryo lamang kining himoun.
Ang adunay rekisitos sa pagpa drug test mao lamang kadtong mosulod sa trabaho sa pagkamaestra ug maestro.
Niadtong Biyernes, Enero 27, nahitabo ang management conference sa tanang principal sa mga tunghaan diin gibutyag ni Manuel nga hisgotan nila ang operasyon alang ning tuig 2017 ug lakip na niini ang pagkalambigit sa duha ka magtutudlo sa pagpayuhot og ginadili nga droga.
Daw gihulat lang usab nila ang kasong ipasaka sa polis batok sa duha, usa sila mohimo og aksyong administratibo batok sa duha ka mga dinakpan.