TINGUHA sa grupong Pinagkaisang Samahan ng mga Tsuper at Opereytor Nationwide (Piston) nga maapektuhan og 80 porsiyento ang dagan sa transportasyon sa Sugbo karong Lunes atol sa welga nga himuon sa mga miyembro niini.
Si Ahmed Cuizon, director sa Land Transportation Franchising and Regulatory Board (LTFRB) 7, nihangyo sa mga sakop sa Piston nga dili moapil sa welga.
Ang ubang pundok sama sa Cebu Integrated Transport Cooperative (Citrasco), National Confederation of Transportworkers Union (NCTU) ug Visayan United Drivers Transport Service magtagbo karong adlawa aron hukman kon moapil ba sila sa transport strike.
Si Greg Perez, coordinator sa Piston Cebu, niingon nga nakahukom ang ilang hugpong nga moapil sa “tigil pasada” sa tibuok nasod sama sa himuon sa ilang mga opisyal sa kaulohan aron mapaabot ngadto sa gobiyerno ang ilang hugot nga pagsupak sa pagwagtang sa mga public utility jeepney nga nagpanuigon og 15-anyos ug pataas ug uban pang mga isyu nga makaapekto sa ilang sektor.
Matod niya moabot og 700 ka mga sakop sa ilang grupo ang dili mamasahero sa Lunes. Ang mao nga mga drayber nagbiyahian sa mga rota sa dakbayan sa Mandaue ug dunay pipila sa siyudad sa Lapu-Lapu ingon man sa mga barangay Mabolo, Guadalupe, Talamban ug Bulacao sa dakbayan sa Sugbo.
Magsugod ang ilang welga alas 4 sa kaadlawon ug matapos alas 3 sa hapon ug human niini magprotesta sila sa buhatan sa LTFRB 7 sa Reclamation Area, ning siyudad.
Ang kagamhanan sa dakbayan sa Sugbo gipangandaman ang mamahimo nga epekto sa dili pagpamasahero sa mga sakop sa Piston sa Lunes.
Si Francisco Ouano, operations chief sa Cebu City Transportation Office (CCTO), nibutyag nga 12 ka mga Kaohsiung buses ang ilang ipakatap sa kadalanan sa siyudad nga maoy mohakot sa mga pasahero nga matanggong nunot sa dili pagbiyahe sa pipila ka jeep pasaheroan.
Suma pa ni Cuizon kon unsa may mga reklamo sa mga drayber mas maayo nga modangop sila sa legal nga paagi sama sa pagpetisyon, pagsang-at og reklamo sa hukmanan o pagpakigsulti sa mga kongresista o senador aron mopalabang og balaod alang sa ilang mga tinguha.
Ang direktor nidugang nga mahimo sab modangop ang sektor sa mga drayber sa social media aron awhagon ang katawhan sa pagsuporta nila.