DAVAO DEL NORTE -- Usa sa mga ilado ug impluwensiyadong miyembro sa local media nanawagan sa mga kaubanan nga i-boycott ang mga kandidato sa nasyunal nga mobisita sa probinsiya.
"Labi na nang mobisita kunohay nga nagdala na og mga nasyonal media nila? Ilaha na na. Sila sila na lang," ni Dennis Denora, publisher sa lokal nga mantalaan ug member emeritus sa Davao Region Multi-Media Group (DREMMG).
Miabot na og 36 ka tuig nga nangalagad sa media si Denora isip lider sa DavNor ug Compostela Valley Province.
Ang DREMMG maoy usa sa mga organisasyon sa media sa DavNor ug ComVal.
Gilangkuban kini sa mga lehitimong media outlets sama sa newpaper, radyo ug lokal telebisyon.
Gikasagmuyo ni Denora ang sagad pagbisita sa mga nasudnong personalidad ug kandidato nga eksklusibo man usab ug dili makigsandurot sa lokal nga media nga maoy ginasubay sa mga molupyo.
"Kanang ilang dala nga media, aw, kana na lang pod ang ila. Useless man. Wa man na kabalo ang di taga diri sa atua sa atua pung kahimtang ug atong gusto ipangutana," ni Denora.
Bag-ohay lamang usab nga mibisita si Mayor Rodrigo Duterte sa dakbayan alang sa giingong unang proclaimation rally niini sa Mindanao.
"Ok na lang kung naay usa sa atua diri sa lokal nga makaapil. Kung naa ang ilang mga dala nga media, di na lang ta," ni Denora pa.
Nasubay hinuon sa Superbalita nga dunay usa gikan sa lokal media nga nakasulod sa gihimong press conference ni Duterte.
Ang panawagan ni Denora dili lamang alang sa mga kaubanan sa DavNor ug ComVal kon dili, sa tanan nga mga practicing media.
Ang baruganan ni Denora dili sab sa tibuok DREMMG ug ubos pa sa diskusyon ug pag-aproba sa tanan ang maong tumong.
Tan-awunon usab matud pa ang umaabot nga national debate sa Cagayan de Oro City diin makita unsa ang mahatag nga partisipasyon sa mga lokal nga media. (DRP)