SOBRA sa katunga ang pag-us-os sa ihap sa mga kaso sa dengue lukop probinsiya sa Nobiyembre kon itandi niadtong Oktubre karong tuiga.
Gitumbok sa Provincial Health Office nga posibleng magpadayon ang pag-ubos niini sa sunod tuig kon padayon sab nga magpakabana pagpanglimpyo sa palibot ang mga Sugbuanon.
Sa mga buwan sa Agosto, Septiyembre ug Oktubre natala sa PHO ang hilabihan kadaghang mga kaso sa dengue.
Niadtong Agosto, 1,086 ang mga kasong natala, 1,067 usab niadtong Septiyembre ug Oktubre, anaa kini sa 1,559, nga maoy labing daghan karong tuiga.
Sa Oktubre usab gideklarar sa Kapitolyo ang dengue outbreak sa tibuok probinsiya sa Sugbo.
Apan gipahibawo sa PHO nga sa Nobiyembre, dako ang pag-us-os sa ihap sa mga dengue cases dinhi.
Sa maong buwan, 785 ka mga kaso na lang ang natala ug sobra sa katunga ang nakuha gikan sa uwahing ihap niadtong Oktubre.
Matod sa dengue monitoring in-charge sa Provincial Epidemiology and Surveillance Unit, Cyril Pangatungan, dako og natampo niini ang gikampaniya nga regular nga kampanya sa pagpanglimpyo sa Probinsiya.
Bisan og nakuhaan og sobra sa katunga ang mga kaso sa dengue sa miaging buwan, gipadayag sa PHO nga taas gihapon ang kapin sa 700 ka mga kaso sa sakit.
Sigun sa labaw sa PHO-Public Health, Dr. Ismael Pastor, posibleng mas moubos pa kini karong buwana ug hangtud na sa sunod tuig kon ipadayon sa katawhan ang mga nasugdang lakang batok sa makamatay nga sakit.
Sa kinatibuk-an, moabot na ngadto sa 8,218 ang mga dengue cases nga natala sa lalawigan sa Sugbo sukad niadtong Enero hangtud sa Nobiyembre karong tuiga.