NANAWAGAN og tabang ang mga nasunogan lakip na si kapitan Omar Labuntog, sa Barangay Lapasan, dakbayan sa Cagayan de Oro.
Mokabat sa P1.5 milyones ang damyos diin 19 ka mga panimalay ang naugdaw ug tulo niini ang partially damage sa pag-ulbo sa kalayo niadtong Martes sa kadlawon, Disyembre 13, sa La Paz 2 Kolambog, Lapasan ning dakbayan.
Sa pakighinabi sa SunStar SuperBalita ngadto sa mga biktima giingong halos kanila ang walay mga nabitbit ug tapot lawas lamang kini sila nga nanagan pagawas sa mga tagsa-tagsa ka mga panimalay.
Giingong nanghangyo kini sila nga unta matabangan bisan na lamang sa mga personal nga mga panginahanglanon sama sa mga sinina ug pagkaon.
“Wala gayud mi nahipos, tapot lawas ra gyud, among kwarta mga gamit apil tanan nangasunog,” pahayag ni Arlene Seismondo, ang nanag-iya sa panimalay diin nagsugod ang kalayo.
“Pagkaon gayud kay wala mi makaon bisan gamay wala mi nadala,” dugang pahayag sa usa sa mga biktima.
Samtang gidugang pa usab ni Julio Baguhin kinsa lakip usab sa naugdaw nga panimalay nga mapasalamaton na lamang siya gumikan kay walay nakalas nga kinabuhi atol sa pag-ulbo sa dakong kalayo.
“Mamasko mi ani nga wala, sige lang pasalamat ra gihapon kay walay naunsa, mobalik ra gihapon mi diri kay wala man mi laing adtoan,” pahayag ni Baguhin.
Naghangyo usab si Labuntog nga kon kinsa man ang adunay mga sobra nga mga nadawat ning Pasko nga unta motunol bisan og ginagmay diha sa mga sakop sa barangay aron nga makahatag og kalipay sa mga nabiktima sa sunog.
“Kung naa moy daghan nga pangregalo diha nga inyong na reserba basin makalipay mo og pipila ka katawhan dinhi sa Barangay Lapasan kung inyong mga regalo sa Christmas inyo na lang ihatag dinhi sa mga biktima sa nasunogan,” pahayag ni Labuntog.
Sa pagkakaron, ang pipila ka mga biktima ang kasamtangang anaa pa sa covered court ug andam nga modawat sa mga tabang alang kanila bisan sa mga simpleng mga butang nga itunol kanila dako na kaayo ni nga tabang ug pahalipay alang sa mga biktima.