Mga pulis sa drug payola atua sa Crame

ATUA na sa Camp Crame sa kaulohan ang mga pulis nga giingong nagdawatan og payola gikan ni Franz Sabalones, ikaduhang big time drug lord sa Central Visayas.

Si Joel Bersales, a­hen­te sa Philippine Drug En­forcement Agency (PDEA) nga nadestino sa Bohol ug apil sa ginganlan sa drug matrix, ang tua na usab sa Administrative Holding Office sa central office, pagkompirmar ni PDEA 7 Director Yogi Ru­iz.

Si Police Regional Office 7 Director Noli Taliño nakugang sa nigawas nga drug matrix diin 18 ka mga pulis ug usa ka PDEA agent ang gilambigit ni Sabalones sa iyang illegal drug trade.

“Siyempre nakakagulat kasi may mga pulis na naman na na-involve dito kung totoo man itong sabi ni Franz Sabalones. But as I have said dadaan ito sa normal process,” sumala sa opisyal sa ka­pulisan.

Samtang, kinahanglan pasakaan og kaso ang mga pulis nga gitumbok ni Sabalones nga giingong mga tigpanalipod niini sa negosyo sa ginadili nga drugas, matod ni Acting Mayor Edgardo Labella.

Siya niingon ang pagsang-at og kaso sa mga gipasanginlan maoy higayon nga makapasupot sila sa ilang habig kon tinuod o dili ang pasangil.

Apil sa ginganlan sa drug matrix ang tulo ka mga kanhi opisyal sa PRO 7 nga sila si Supt. Rex Derilo, kanhi hepe sa Regional Intelligence Division; Supt. George Ylanan, kanhi hepe sa Regional Special Operations Group; ug Supt. Teodulfo Manatad, kanhi hepe sa Carcar Police Station.

Sila si Derilo ug Ylanan, pulos nilimod sa pasangil nga sila mga protektor ug nagdawatan og payola gikan ni Sabalones pinaagi sa ilang manlalaban nga si Inocencio de la Cerna.

Ang abogado gusto makakuha og kopya sa matrix nga gihatag ni Sabalones ngadto sa kapulisan ug nakakuha og kop­ya ang UNTV news.

Matod ni de la Cerna dili mahimo magamit isip ebidensiya ang pasangil batok sa iyang mga kliyente.

“Kon matrix lang ang basehan that is not an evidence,” sumala sa manlalaban sa report sa Balitang Bisdak kagahapon.

Si Derilo nagduda nga dunay grupo nga gusto nga siya maoy iduot ug pinaagi niini siya maoy itudlo nga nalambigit sa illegal nga kalihukan sama sa pagdawat og payola gikan sa illegal drugs.

“I categorically deny such allegation. Dili na nako puwede mabuhat, dili pud nako na buhaton pud,” pahayag ni Derilo.

Iyang gibarugan sa mga Sugbuanon nga lim­piyo ang iyang konsensiya ug wa siya malambigit sa illegal nga drugas.

Si Ruiz nibutyag nga niadtong Sabado lang niadto si Bersales sa ilang central office human nibuto ang balita nga nalambigit kini sa drug matrix ni Sabalones ug di kini mahimo mobiya sa AHO kon dili mananghid sa ilang labaw.

“Tagaan nato og due process ang tawo, da­li ra man kaayo ang pag-alledge,” dugang sa di­rector sa PDEA 7 sa pa­kighinabi sa Superbalita Cebu.

Matod ni Ruiz, dag­han nagamga operasyon ang napahigayon si Bersales sa Sugbo sud sa pito ka tuig isip team leader sa south area. Apil na niini ang pagkasikop sa kanhi market administrator sa Dumanjug nga si Jose Perfecto Amadora, gidudahan nga drug lord sa lungsod.

Si Bersales gidestino ni Ruiz didto sa Bohol dihang nilingkod ang director sa puwesto niadtong Hulyo ning tuiga.

Si Labella, kanhi director sa Ombudsman, ni­­ingon nga kon way i­­­sang-at nga kaso batok sa mga pulis, kinahanglan molusad og moto propio investigation ang Office of the Ombudsman Visa­yas.