COMPOSTELA VALLEY PROVINCE -- Nagpabilin nga andam ug alerto ang tropa sa 10th Infantry Division, Philippine Army, luyo sa pagdeklara sa Suspension of Offensive Military Operation (Somo).
Ang Somo usa lamang ka unilateral agreement nga nagpasabot nga walay gikasabot ang Armed Forces of the Philippines, kon dili usa kini ka rekomendasyon sa Department of National Defense (DND) nga giuyonan sa pamuno-nasud.
Sa interbyu kang Captain Ryan Batchar, tigpamaba sa 10th Infantry Division, gibutyag niini nga epektibo alas 12:01 sa kaadlawon karong adlawa Disyembre 23, 2015 ang Somo ug matapos kini alas 11:59 sa gabii sa Enero 03, 2016.
Tungod niini, gihunong una ang mga opensiba-militar sa tibuok nasud.
Apan giklaro ni Captain Batchar nga nagpabilin nga alerto ang kasundalohan ug andam nga mosuporta sa pagpatuman sa balaod kauban ang Philippine National Police.
Gidugang niini, padayon ang ilang paghatag og seguridad sa ilang area of responsibility aron maseguro nga luwas ang publiko panahon sa Pasko ug Bag-ong Tuig.
Nagdeklara sab ang NPA nga hunungon ang opensiba batok tropa sa kagamhanan.
Kon kahinumdoman, nagkaduol ang Somo sa duha ka grupo apan nagka-engkuwentro ang mga sakop sa 66th Infantry Battalion ug 30 ka mga sakop sa Guerilla Front 25, NPA-Southern Mindanao Regional Committee, alas 12:30 sa hapon niadtong Lunes didto sa Barangay Kahayag, New Bataan, Compostela Valley.
Segun sa taho sa kasundalohan, paspas nga misibat ang NPA gikan sa baryo dihang gisundan sa mga sundalo human sab gisulti sa mga residente ang direksiyon niini.
Narekober sa kasundalohan gikan sa encounter site ang usa ka backpack nga dunay 100 metros nga wire, medical paraphernalia ug mga subersibong dokumento.
Human sa engkuwentro gilayong mipahigayon og checkpoint ang New Bataan Municipal Police Station ilawom ni Police Chief Inspector Ernesto M. Gregore ug mga sakop sa 66th IB diin gipatuman ang Oplan Sita diin 17 ka mga motorsiklo nga walay legal nga dokumento ang naharang ug giimbestigahan sa awtoridad.
Tungod sa insidente, nag-alerto ang kapulisan ug militar dungan sa pagpatuman sa hugot nga seguridad.