NAANGKON sa probinsya sa Misamis Oriental ang titulong Most Outstanding Provincial Agriculture and Fisheries Council (PAFC) sa gipahigayong Gawad Saka Award 2017 sa kaulohan adlawa’ng Huwebes, Abril 5.
Personal nga gisaksihan ni Gobernador Yevgeny Vincente Emano ang pagdawat sa pasidungog nga gitunol sa Department of Agriculture (DA) nga gipahigayon sa Malacañan Palace, Manila diin dinapit ug mitunol sa pasidungog si Presidente Rodrigo Duterte.
Kauban niya sa pagdawat mao si Misamis Oriental PAFC chairman Mario Jamis ug DA-Northern Mindanao Director Carlene Collado.
Ang pasidungog maoy resulta sa paningkamot sa Lokal nga Panggamhanan sa Misamis Oriental ubos sa administrasyon ni Gobernador Emano kalabot na sa programa sa agrikultura, partikular sa programang panginabuhian alang sa mga mag uuma lakip na ang Itikan sa Kalambuan.
“Sa tanang lalawigan sa tibuok Pilipinas, Misamis Oriental ra ang nakit-ang daghang programa sa agrikultura nga gihatag ngadto sa mga munisipalidad ug duha ka dakbayan sa lalawigan. Ang Itikan sa Kalambuan maoy nakabira og maayo nga nasungkit gayud nato ang pasidungog. Pinaagi niini nakita ang kabag-ohan ug kalambuan sa katawhan sa lalawigan” sulti ni Dr. Benjamin Resma, Provincial Agriculture Office Head.
Gawas pa niini, laing pasidungog usab ang nakab-ot sa Misamis Oriental pinaagi sa Malinis at Masaganang Karagatan (MMK) usab gikan sa DA.
Nakuha kini sa Lungsod sa Laguindingan, Misamis Oriental, ang pasidungog nga Malinis at Masaganang Karagatan (MMK) Award diin gipildi niini ang upat ka munisipyo nga nag gikan sa nagkalaing-laing probinsya sa nasod.
Kauban gihapon si Gobernador Bambi sa pagdawat sa pasidungog ug ang amahan sa Laguindingan nga mao si Mayor Diosdado Obsioma; Bise Mayor Roy Macua ug Municipal Agriculture Officer Diosdado Ayson.
Gawas sa pasidungog, duna pay P30 milyones nga balor sa proyekto sa agrikultura ang nadawat sa nasangpit nga munisipyo.
“Ang Laguindingan lamang ang nakasungkit niini tungod sa Sustainable Resource Coastal Management nga gilangkuban sa Science Based nga pamaagi maoy nakapaminus sa epekto sa Climate Change ngadto sa gitawag og Carbon Sequestration sa Mangroves,” matud ni Dr. Resma.
Dili masukod ang kalipay ni Governor Emano tungod niini nga pasidungog diin sa makausa pa laing kadungganang nakab-ot sa probinsya kung hisgutanan sa programa sa agrikultura ug pangisda.
“Dili nato kini maangkon kung dili tungod sa atong paningkamot ug panaghiusa pagtulod sa lalawigan ngadto sa kalambuan ug kalampusan. Akong dakong pagdayeg sa atong mga kaigsuonang mag-uuma ug mangingisda, lakip usab ang suporta ug pag-abag sa lokal nga pangagamhanan sa matag lungsos sa lalawigan hilabina sa lungsod sa Laguindingan,” malipayong pahayag ni Gobernador Bambi Emano.
Subay niining prestihiyosong pasidungog sa usa sa haligi sa pangoberno nga ubos sa agrikultura nagpamatuod lamang kini nga ang kagamhanan ubos sa iyang liderato ni Gov. Bambi nakasubay sa mga gabayan, adunay transparensya ug tinud-anay nga panerbisyo. (SVB)