MALINAWON og luwas ang panagtapok sa mga miyembro sa Moro National Liberation Front (MNLF) atol sa pagselebrar sa ilang ika-50th founding anniversary kagahapon.
Ang Talomo Police Station sa pagpanguna ni Chief Inspector Ronald Lao, ilang giseguro nga malinawon ang pagtapok sa MNLF didto sa Crocodile Park, Davao City.
Makabat 1,000 ka mga miyembro sa MNLF ang midagsang sa Crocodile Park diin nagtapok sila ug dunay gihimong programa gikan alas 9 sa buntag.
Sumala ni Davao City Police Office (DCPO) Spokesperson Senior Inspector Ma. Theresita Plaza-Gaspan nga ilang giseguro nga luwas ang mga kaigsuonang Muslim sa ilang pagselebrar.
"This is to ensure our Muslim brothers and sisters that they can have a peaceful and safe celebration in the City," mensahe ni Gaspan nga gipadala sa SuperBalita kagahapon.
Usa sa mga unod sa programa sa ika-50 ka tuig nga kamugnaan sa MNLF mao ang pagsuporta sa kasamtangan nga administrasyon.
Nanawagan sab sila sa kahiusahan sa mga Moro sa Autonomous Region
in Muslim Mindanao (ARMM) ug ang paghatag og kusog sa mga programa sa Bangsamoro Regions.
Una niini, madasigon ang MNLF nga miapil sa Parada Dabawenyo sa ika-81st Araw ng Dabaw niadtong Biyernes ug kinasingkasing sila nga gihangop sa Dabawenyo gumikan pipila sa ilang mga miyembro ania na sa Davao City namuyo.