ANG "Kusina ng Bayan" kun mobile kitchen sa City Social Services and Development Office (CSSDO) sa lokal nga kagamhanan sa Davao City miarangkada na sa unang pagserbisyo niini.
Sumala ni Luz Farañal, focal person sa CSSDO, nga una nang nagamit ang mobile kitchen sa mga residente nga namakwit gikan sa old dumpsite.
"Six days na nato nagamit ang atong mobile kitchen didto sa Tugbok sa mga residente nga namakwit from old dumpsite," sulti ni Farañal.
Nagamit na sab ang mobile kitchen sa mga nasunogan sa Purok 26, Muslim Village, Ecoland diin dul-an 100 ka mga indibiduwal ang nakahimulos sa 'one day menu' diin milungtad kini hangtud kagahapon sa ilang ikaduhang adlaw.
"Six days with menu, dunay pamahaw, paniudto ug panihapon," dugang niya.
Gawas sa pagkaon nga gidalit sa mobile kitchen sa Cssdo, naghimo sab og community cooking ang barangay aron makaabag sa pagkaon sa mga biktima.
Una niini, Septyembre 25 ning tuiga gi-launch ang duha ka mga mobile kitchen nga dunay kantidad nga P2.6 diin mismong si Davao City Mayor Sara Z. Duterte-Carpio ang nanguna sa launching.
Sumala ni CSSDO head Ma. Luisa Bermudo nga kompleto ang og kagamitan ug mga recipe ang mobile kitchen nga maoy andam nga moadto sa mga dapit diin asa natigayon ang trahedya ug modalit og pasiunang pagkaon sa mga biktima.
"Ready-to-eat food apil na ang hot noodle soup, hardboiled egg, lugaw (rice porridge), champorado (chocolate rice porridge). We'll provide coffee kung kailangan, or Milo (chocolate drink) for our children," sulti ni Bermudo. (Jeepy P. Compio)