Mongaya: Gibabagan o mismanagement?

NABONGGO na sab karon kining P1.5 bilyones nga pundo alang sa mga drainage projects karong tuiga apan wa gamita sa administrasyon ni Mayor Mike Rama.

Dugang ba kini sa P3 bilyones nga mga proyektong dunay budget sugod sa 2010 apan wa pa mapatuman sa admi­nistrasyon ni Mayor Rama, wa man mahisguti sa mga balita.

Duna pa ganiy P500 milyones alang sa mga proyekto sa 2014 nga nasakpan sa Commission on Audit kun COA.

Ambot lang hinuon kon ki­ning maong kasayuran motuhop ba sa alimpatakan niining mga tawo nga maayong pag­sakay sa front seat sa gii­ngong walay proyekto si Mayor Rama kay gibabagan sa Konseho.

Ambot lang kon kining kamatuoran nga gihatagan og budget ang administrasyon a­­­pan wa gamita makapausab ba sa pagsanay niining bakak nga ang kawalay performance sa administrasyon tungod ba kay wa makalusot ang gipanga­yong budget sama sa Supplemental Budget 1.

Ako lang mabantayan nga kon mohisgot kag punto nga sukwahi sa babag, ingnon da­yon nga pro-BOPK. Kon modu­yog sa punto nga babag, aw mao kuno kanay tinuod nga da­gan sa City Hall affairs.

SB 1 ug SB2

Tungod niining kamatuo­ran nga pipila ka bilyones ka pesos diay ang gigahin na, gi­pundo na, alang sa mga pro­yekto apan wa gamita, nakakwestyon ko niining magsigig hisgot nga gibabagan sila.

Alang kanako, nagkaklaro nga usa lamang kini ka propa­gan­da aron matabunan ang di maayong pagdumala sa syudad.

Kini pananglit ang supplemental budget 1 nga giingong gikinahanglan tungod sa performance bonus ug sa tipping fee sa basura. Grabing nakapa­ngugat sa pipila, bisan pa man sa mga wa gikinahanglang mga budget item nga gipangsakay, nga kini pagbabag kuno kay wa lagiy laing pundo nga magamit.

Giralihan pa nga niresulta hinuon sa usa ka reklamo diha sa Civil Service ug umaabot nga problema sa naapek­tohang mga empleyado.

Bahala na kon ubang mga LGU makahatag og bonus bi­san wala mamaligyag yuta. Bahala nag duna diay pundo nga mahimong i-realign sa administrasyon.

Sa miaging tuig bitaw, gi-realign man sa administrasyong Rama ang budget alang sa drainage ug gihatag sa CCMC. Dayon gi-realign na sab kay ihatag sa mga senior citizen. Buot ipasabot, mahimo diay ang pag-realign.

Tuod man, giduso na sab karon ang SB2 nga mohatag og performance bonus ug pundo alang sa basura. Buot ipasabot, naa gyud diay pundo. Naglibog ko nganong giraliralihan pa man ang SB1. Aron lang gyud ipalanog ang propaganda nga babag?

Kamatuoran

Lami gyud isyagit og buno kon tinuod pa kining punto nga way proyekto ang adminis­trasyong Rama kay ang budget gibabagan.

Apan tungod niining mga nanggawas nga kasayuran ka­bahin sa mga proyektong gi­­­panghatagan na og pundo sa Konseho apan wala ma-imple­ment sa administrasyon, naka­ingon gyud ko nga bakak gyud diay kining ilang gipatigbabaw nga babag.

Ug nakapangutana ko nga di ba kaha mismanagement ang kamatuoran.

Resibo

Nasinta ko pasado alas says sa miaging gabii dihang nagpagasolina mi sa AutoGas station sa Imus.

Niinsister man ko og official receipt imbes sales invoice apan niisa hinuon ang tingog sa usa ka gasoline girl kay mao gyud kuno to ang ilang ihatag. Dihang niingon ko nga makig-istorya sa manager o sa tag-iya, giingnan ko nga di makontak.

Dunay Facebook friend nga niingon kanako nga basin mahimo ra ang maong sales invoice. Aw, mas maayo gyud tingale nga susihon nato sa Bureau of Internal Revenue (BIR) ugma.

@anol_cebu sa Twitter