KLARO man nga ang tarpaulin nga gitaud kagahapon sa usa ka skywalk diha sa Basak-Pardo nagduso sa alegasyon nga si kanhi mayor Mike Rama nalambigit sa gidiling drugas.
Daw naghulga ang maong tarp nga si Rama maoy mosunod kang Atty Jonah John Ungag ug anhing mayor Rolando Espinosa. Kahibawo na man kitang gibuno kini silang Ungab ug Espinosa.
Dihang gipangutana ko sa akong higala nga si Souie Mercado diha sa Maghisgot Kitag Politika Bay sa Facebook, gisumbalik nakog pangutana kon si kinsa may makabentaha kon di na molansar si Rama?
Alang kanako man gud, mas bentaha alang kang Mayor Tomas Osmeña kon silang duha ni Bise Mayor Edgar Labella ug Rama magdungan og dagan alang sa pagka mayor.
Apan kining isyu sa gidiling drugas maoy dakong isyo batok kang Rama ug naapektahan ang iyang pundok.
Kahinumdoman, unang napatik ang maong hulagway dinhi sa Superbalita nga gikuha sa paghurar ni anhing Rolando Espinosa nga isip sakop sa UNA nga nilansar niadtong tungora alang sa pagka mayor sa lungsod sa Albuera sa Leyte.
Si Rama, nga maoy Central Visayas coordinator sa UNA, maoy naghurar kang Espinosa. Lakip sa testigo mao sila si Ungab ug piskal Mary Ann Castro.
Si Rama mismo nag-ingon sa usa ka balita kabahin sa iyang pagduol kang Sal Panelo nga kining maong hulagway maoy nakapalambigit kaniya sa listahan ni Presidente Rodrigo Duterte.
Ikaduha na gihisgutan ni Presidente Rodrigo Duterte ang maong listahan sugod kaniadtong 2016 pa ug hangtod karon wa gyud siya bisan na lang maka-atubang kang presidente aron paglimpyo sa iyang ngalan.
Kahibulongan nganong si Rama di maka-appointment kang Duterte nga naa man unta si Presidential Assistant for Visayas Mike Dino nga dali kaayong maka-imbitar sa presidente dinhi sa Sugbo.
Si Peter Lim mismo dali kaayong nakaatubang kang Digong sa Davao. Dali sab kaayong nakaresponde ang Malakanyang dihang nagpatabang ang anak sa igsuon ni Peter Lim kabahin sa usa ka kaso nga pagpamusil.
Didto sa lalawigan sa Ilo-ilo, duha ka mayor ang gipapas na sa listahan ug nagpasakop na sa PDP-Laban.
Alang kanako, kahibulongan gyud nganong gipasagdan lang si Mike Rama nga magpas-an sa maong isyo gawas kon gituyo kini siya sa pagduot sa daplin.
Karon, mobalik ko sa pangutana kon si kinsa ang makabentaha kon di na modagan si Rama alang sa pagka mayor?
Kon moingon kita nga si Tomas, di ba makatabang kaniya kon sila si Labella ug Rama parehong modagan?
(@anol_cebu sa Twitter)