DUGAY na man kining mga istorya kabahin sa Davao Death Squad. Mao nga interesado kong naminaw sa testimonya ni Edgar Matobato diha sa imbestigasyon sa Senado. Palpak lang siya.
Nagpataka lang siya sa pagpadayag sa mga detalye kabahin sa pagpatay sa anhing negusyante Richard King. Wa man pusila si King sa usa ka outlet sa McDonalds, didto man taas sa Vital C building.
Matod pa ni Sen. Ping Lacson, wala nay PAOCTF kaniadtong 2002 nga gipatay kuno ang usa ka international terrorist nga ginganlan og Sali Makdum. Ang nakaapan lang sab kay bisan unsaon pag-search sa Google, wala may nailhan nga international terrorist sa maong ngalan.
Dayon, nihimakak ang kampo sa mga Nograles nga duna silay mga bodyguard nga gipamatay sa giingong DDS.
Ingon niining mga inconsistency sa iyang testimonya ang nakapaduda kanako sa kredibilidad niining Matobato.
Bisan pa man, si Matobato nihatag og nawong sa giingong Davao Death Squad ug gisawo na kini sa usa ka tigpamaba sa US State Department.
Posibleng sab moabli kini sa pultahan sa daghang kaayo pang mga sekreto.
Sa ingon niini nga pagtan-aw, duna gyuy posibilidad nga moseryuso pa kining maong imbestigasyon.
Apan moresulta ba kini og impeachment?
CAYETANO
Alang kanako, hinanggaw na sab kining drama ni Sen. Alan Peter Cayetano nga magsigig hisgot og Plan B sa Liberal Party.
Nganong nakaingon ako niini? Kay ang administrasyon ni Presidente Rody Duterte dunay super majority diha sa Kongreso ug Senado.
Unsaon man pagkakuha og igong suporta ang usa ka impeachment complaint diha sa Kongreso. Mouyon diay ang alyado ni Cayetano nga si House Speaker Bebot Alvarez.
Klaro man nga ang tinuod nga minoridad diha sa Ubos Balay Balauranan wa man makaabot og napulo. Unsaon pagpasar sa usa ka impeachment complaint?
Diha sa Senado hinuon, tulo lang silang Cayetano ang naa sa minority. Pero nakahibawo na man kita nga pulos independente man kining mga senador. Bisan pa man, dakong pangutana kon makaabot ba ang usa ka impeachment complaint ngadto sa Senado.
PLAN B
Kahinumdoman, linya sa kampo sa mga Marcos kining giingong plan B. Ang pangutana karon, nganong si Sen. Cayetano ang nangugat?
Sa akong tan-aw, nangita kini karon si Cayetano og sitwasyon nga makapapapel siya, mabalik sa mga front page sa mga mantalaan, ug masaligan ni Presidente Duterte.
Unsaon, nawani man gud kini siya sa miaging eleksyon. Si Bongbong Marcos man gyud diay ang pinangga sa presidente.
Nawani sab siya sa iyang tinguha nga modumala sa HUDCC nga gihatag ni Presidente Duterte kang Bise Presidente Leni Robredo.
Samot nga nawani si Cayetano diha sa Senado. Gani, sa iyang kahiubos nga wala mapiling Senate President, wala kini magpakita dihang pormal nga gipili si Senate President Koko Pimentel.
Makalingaw sab kining si Cayetano nga kadtong impeachment ni Chief Justice Corona ug ang imbestigasyon ni kanhi bise presidente Jojo Binay, grabing panghimakak niya nga ang ilang gibuhat gipaluyohan sa Liberal Party.
Karon, moingon siya nga kining ingon niini nga kalihokan diha sa Senado, iyaha sa Liberal Party.
Sa akong tan-aw, imbes maghinanggaw og baruganan kining si Cayetano, motabang hinuon siya nga mopalig-on sa mayoriya sa administrasyon.
(@anol_cebu sa Twitter)