NAKAHIBAWO na man kitang tanan nga aprub na ang Bus Rapid Transit (BRT) ni Presidente Rodrigo Roa Duterte ug sa World Bank.
Nakahibawo na man sab kita nga tuyo sa BRT mao ang mas moderno nga mass transport kay sa pagkakaron nga mao ang pagsalig sa mga PUJ kun mga jeepney.
Gilauman nga makapaspaspas sa pagdala sa mga tawo gikan sa habagatan padung sa amihanang dapit sa syudad ug pabalik. Tuyo ang pagpahapsay sa dagan sa transportasyon gamit ang mga bus nga moagi sa mga dedicated lanes.
Buot ipasabot, dunay mga lane nga way laing moagi mao lang ang mga bus sa BRT.
Ug kini magsugod sa Bulacao padung sa Osmeña Blvd. dayon moliko padung sa Kapitolyo ug molahod sa dalan Escarip padulong sa Banilad.
Gilauman nga ķining maong proyekto mahimomg alternatibo sa sistema karon nga nagsalig sa mga jeepney.
Akong nasabtan nga di man gyud mapapas ang mga PUJ. Did-an lang ang mga PUJ sa ruta sa BRT. Usbon ang mga ruta aron ang mga PUJ maoy mohatod sa mga pasahero ngadto sa mga BRT station.
Sa pagkakaron, nakita nato nga epektibo kining KMK bus, ang MyBus sa SM, ug ang mga bus sa Robinson.
Nagkaanam ka daghan sa mga Sugboanon ang mosakay na sa mga bus. Unsa na kaha kon dunay mga lane alang lang sa BRT?
Tinuod, dunay kahuot sa trapiko nga resulta samtang gitukod pa ang maong sistema. Apan nasiguro kita nga mahapsay ang transport system sa Syudad sa Sugbo.
Nasiguro sab kita nga di man conflict kini sa tinguha nga magtukod og LRT o MRT sa tibuok Metro Cebu.
Mao nga kahibudngan kaayo kining tinguha ni Presidential Assistant for Visayas Mike Dino nga babagan ang BRT.
Wa niya panumbalinga nga aprubado na kini ni Presidente Duterte ug sa World Bank.
Wa niya panumbalinga nga moresulta kinig binilyon nga multa sa World Bank ug dakong kaulaw sa Syudad sa Sugbo.
Duha ka butang lang ang atong masabtan nga motibo ni Dino.
Una, pamulitika. Di siya gusto nga dunay agi ang administrasyon ni Mayor Tomas Osmeña. Bahala na og uyon si Digong sa maong proyekto.
Ikaduha, makaduda ang pagduso ni Dino sa LRT nga duna nay presyo gikan sa usa ka supplier sa Singapore.
Makaduda kay sigurado na siya sa maong supplier bisan pa og wa pay feasibility study ug wa pay bidding. Simbako kon sakto ang atong pagduda, pila kahay gisaad sa maong supplier?
Basta ang ako lang karon, ang MyBus sa SM timailhan nga epektibo ang BRT.
(@anol_cebu sa Twitter)