UNSA ka tinuod nga nangadto sa kaulohan ang grupo ni Bise Mayor Edgardo Labella sa miaging semana aron didto na sila mokuha niining Basic Membership Seminar (BMS) sa PDP-Laban?
Bisan pa man gud og magsigi silag pangugat nga sakop sila sa partido tungod niadtong ilang paghurar diha sa Plaza Independencia sa miaging Nobiyembre 17, 2017, di man sila maisip nga sakop sa partido kon walay BMS.
Lahi sa lalawigan sa Sugbo kay nag-anam-anam og kuhag BMS ang mga nanghurar, wa man giila ug gitahod nilang Vice Mayor Labella ang liderato sa Cebu City chapter dinhi sa Syudad sa Sugbo.
Nakaila gud si Vice Mayor Labella kay silingan man sila ni PDP-Laban Cebu City chapter president Lorna Bacalla.
Apan imbes magpa-BMS sila sa grupo ni Bacalla subay sa naandang paagi sa partido, nagpahurar na man hinuon kini didto sa kaulohan atubangan ni Speaker Bebot Alvarez.
Karon, matod pa nga nangadto na sab kini sa kaulohan aron adto na lang magpa-BMS.
Nagpaabot sab tawn ko og balita kon nadayon ba. Kay nagkanayon ang usa ka press release gikan sa ilang pundok nga BMS na man lang gyud ang kuwang. Inig human niini kay ila nang ma-organize ang PDP-Laban sa Syudad sa Sugbo.
Ang nakapa-intriga lang kanako kay ang grupo nilang Bacalla nag-courtesy call kang Mayor Tomas Osmeña.Nagpahulagway alang sa Facebook.
Dino
Alang kanako, kinahanglang tarungon pagbalik ang maayong relasyon nilang Vice Mayor Labella ug Cebu City chapter president Bacalla.
Sa akong nasabtan, maayo man ang ilang relasyon kaniadtong 2016 labi na sa panahon nga aktibo pa ang MRRD nga anha magtigum sa Roble building panahon sa kampanya.
Di lang ko siguro kanus-a kini nalubog. Sa panahon na ba nga nisulod si OPAV Mike Dino isip lider sa oposisyon sa Syudad sa Sugbo?
Ang problema lang kay di man sakop si Dino sa PDP-Laban ug di sab gyud siya sweto sa mga pamaagi sa partido.
Ang klaro alang kanato mao ang iyang suporta kang Labella ug wa pagtabang kang kanhi mayor Mike Rama nga matangtang siya sa listahan ni Presidente Duterte.
Apan murag uwahi na man karon kay bisan ang anak ni Presidente Duterte nga si Mayor Sara Duterte nagpalayo na man kang Speaker Alvarez.
Unya, motuo ka sa istorya karon sa mga sakop sa Team Rama nga rehiyonal lang kining Hugpong Ng Pagbabago ni Mayor Duterte?
Sa akong nahibaw-an, dunay dakong ranggo sa PDP-Laban nga hilom nibisita sa Syudad sa Sugbo aron mahiusa ang lain-laing mga pro-Duterte groups dinhi. (@anol_cebu sa Twitter)