NABIYAAN nga blower nga nakasaksak ang hinungdan sa natigayong gamay nga sunog niadtong Huwebes, Enero 26, alas 8:15 gabii sa Block 4 Piaping Puti, Barangay Macabalan, dakbayan sa Cagayan de Oro.
Ang balay ang gipanag-iyahan sa usa ka Luzminda Putotan kinsa residente sa maong dapit.
Swerteng dali ra usab nga napakgang ang sunog human nga namatikdan kini dayon sa tag-iya sa panimalay.
Giingon ni Pututan nga nabiyaan, matud pa sa iyang kaugalingong anak nga kamagulangan, ang blower nga nakasaksak sa extension wire hinungdan sa pag-ulbo sa kalayo gumikan na usab kay na over heat ang butang.
Gidugang pa nga maayo na lamang nga iya dayon nga nakita og natabang ra ang pagdako sa kalayo. Walay natalang naangol atol sa natigayong sunog diin nagsumikad sa dingding sa may outlet nga bahin sa balay.
Gibana-banang mokabat sa P1,000 nga damyos ang natala atol sa sunog ug giimbestigahan pa sa tinugyanan sa Bureau of Fire Protection (BFP) ang tinuod nga hinungdan sa sunog.
Padayon usab ang pahimangno sa tinugyanan sa BFP nga mamahimong responsable aron nga malikay sa susama niini nga mga insidente.