TUYO unta ni Mario Batlag Tanguan, 51, nga mopauli sa ilang balay gikan sa trabaho.
Apan wa na siya makauli.
Usa ka PUJ, kansang driver nigawas sa iyang lane aron pag-overtake sa ubang mga sakyanan, nakaigo ug nikutlo sa iyang kinabuhi mga pasado alas 9 sa maiging gabii atubangan sa University of San Carlos-Technological Center (USC-TC) sa Nasipit, Talamban, dakbayan sa Sugbo.
Nadala pa sa tambalanan si Tanguan, apan namatay siya sa paglabay sa pipila ka oras.
Ang nakadasmag kaniya nga PUJ biyahe og Talamban (GWL-392) nga gimaniho ni Bonifacio Bontuyan Jr., 24, taga Barangay Guba ning dakbayan.
Sa pasiuna nga imbestigasyon nga gihimo sa Cebu City Traffic Division nagbutyag nga mitabok sa dalan ang biktima paingon na unta mopauli.
Nabunal sa dalan ang biktima human malagpot og pipila ka metros tungod sa kakusog sa impact.