NANGITA ko sa file video sa usa ka talagsaon nga coverage niadtong dekada 90 sa lungsod sa Sibonga. Ang video nga kuha sa camera nga beta movie nindot unta kaayong lantawon ning panahon nga ang Birhen sa Lindogon niduaw dinhi sa dakbayan sa Sugbo. Ang video may labot sa usa ka coverage sa Barangay Lindogon, Sibonga, Cebu diin akong nahimamat ang mga monghi sa usa ka payag nga gipabarug sa usa ka batoon nga bahin sa maong sitio. Ang pamilyang Blanco sa silingang barangay sa Bagacay maoy nagdala nako kauban ang akong Cameraman/editor nga si Joel Belocura sa maong dapit. Didto gipahibalo ko sa katuyoan sa mga monghi pagsangyaw sa mga pagtulon-an ni Mama Mary. Wa magdugay nibarug ang gamay nga kapilya ug nisunod ang pinaka dako nga balay alampoanan, kanang inyong nakita karon nga nagbuntaug sa bungtod sa Lindogon. Di ko makatoo nga ang gamay nga kapilya nahimong usa ka dako nga estraktura nga gibalikbalikan sa daghang deboto gikan sa nagkadaiyang suok sa nasod lahos na sa ubang kanasuran. Galing lang di na namo makit-an ang file video nga gusto unta nakong sud-ongon. Hinuon didto sa nahimutangan sa Birhen naa pa ang mga karaang hulagway nga susama ra gihapon sa video nga among nakuha. Salamat kang Frater Martin Mary Mmea ug mga kauban sa ilang pag-abi-abi kanamo sa maong panahon. Halandumon kaayo kadto nga panghitabo nga di makalimtan hangtod sa hangtod.
Bisita
Gikan karong adlawa hangtod sa Dominggo sa hapon makig-uban kanato si Mama Mary. Mao nga ang mga nga magagikan sa nagkadaiyang dapit nagbaha uban sa ilang mga pangaliya. Mga petisyon alang sa maayong panglawas, kalampusan sa negosyo, biyahe, panarbaho, board examination ug daghan pa ang ilang gihangad kang Mama Mary. Tungod sa kadaghan sa mga deboto nga nag-ampo ug niapil sa kalihukan diha sa IEC Pavilion naghangyo ang atong kapulisan nga magmabinantayon kanunay sa ilang dala nga mga butang sanglit di sab ikalimod nga bisan sa mga relihiyoso nga kalihukan naa gihapoy mga badlongon nga gustong mamiktima. Gani gihangyo sa mga pulis kadtong hilig kaayong mangalahas nga di nalang magsul-ob ug di sab magdala og daghang cash. Sa mga edad edaran na ug sa mga bata, kon mahimo isiguro sila sa pagpahiluna ug may kuyog nga maka-atiman sa ilang panginahanglan. Kon mahimo pa gyud magpabilin nalang sa balay. Gahapon diay sa paggikan sa Birhen sa Lindogon nakahigayon ko sa pag-cover ug sa gipaabot nang daan, hilabihan ka daghan sa mga deboto nga mipagikan ug nikuyog sa convoy. Ang katarungan sa mga nanguyog talagsaon kini nga kahigayonan nga sila mahimong kabahin sa pagduaw ni Mama Mary sa dakbayan sa Sugbo.