CHINESE national nga nag-selfie sa Osmeña Peak ang nahulog sa may gibanabanang gitas-on nga 15 ka tiil ug naligid pa mga 10 metros pasado alas 12:00 sa udto kagahapon.
Si Dalaguete Mayor Ronald Allan Cesante niila sa langyaw nga turista nga si Lau Ten Yan, 35, minyo ug taga Hong Kong.
Matod sa mayor, ang langyaw nakaangkon og lawom nga samad dapit sa iyang tiyan sa tuong bahin.
Si Cesante niingon nga si Lau giingong nipatong sa bato sa tumoy sa Osmeña Peak ug nag-selfie o nagkuha og hulagway, apan kalit kini na-outbalanced tungod sa hangin sa ibabaw ug nahug sa bakilid.
Ang langyaw giluwas sa iyang mga kauban ug guides ug pulis sa lungsod sa Dalaguete.
Alas 2 sa hapon, gidala kini sa Julio Cardinal Rosales Memorial Hospital sa Barangay Poblacion sa lungsod apan gibalhin sa University of Cebu Medical Center, siyudad sa Mandaue.
Si Rhafael Luche, pangu sa Emergency Response Management sa Provincial Disaster Risk Reduction and Management Office (PDDRMO), niingon nga luwas sa makuyaw nga kahimtang ang langyaw.