MIDSAYAP, North Cotabato - Patay ang usa ka trabahador sa konstruksiyon human gidunggab alas 5:20 sa hapon niadtong Biyernes.
Giila ang biktima nga mao si Jecain Lao Sibulboro, 24, minyo ug molupyo sa Barangay Upper, Kiwanan, Midsayap.
Nailhan sab ang suspek nga si Donald Matas, 27, silingan sa napatay.
Matud ni Superintendent Gilbert Tuzon, hepe sa Midsayap Police Office, nga nag-inom ang biktima ug suspek sa birthday sa ila ra sab nga silingan didto sa Barangay Upper, Kiwanan.
Kalit lang nagmaoy si Sibulboro ug gisumbag si Matas diin giparok pa ang ulo niini sa semento.
Tungod sa kasuko ni Matas, mihulbot kini sa iyang dala nga kutsilyo ug gidunggab sa makaduha ka higayon si Sibulboro.
Abtik sab nga nadakpan sa mga nagrespondeng sakop sa Barangay Peacekeeping Action Team (BPAT) ang suspek nga maoy mitunol ngadto sa kapulisan.
Ang biktima gisapupo sa iyang pamilya ug gidala ngadto sa Midsayap Community Hospital.
Apan pag-abot og duha ka oras, nakabsan kini sa kinabuhi human maigo sa tiyan ug dughan.
Gitakda nga pasakaan og kaso nga pagpatay ang suspek, kinsa gibalhog karon sa prisohan sa Midsayap Municipal Police Station.