NIABOT og P82.9 milyones sa labing unang higayon ang koleksyon sa City Traffic Operation Management (Citom) sa tuig 2017.
Kini ang gibutyag ni Francisco “Isko” Ouano, operation head sa Citom gumikan sa ilang hugot nga implementasyon ug pagpanakop sa mga traffic violator.
Labing dako nga kita sa Citom nagagikan sa parking fees nga niabot og P38 milyones, gisundan kini sa administrative penalties nga P17 milyones ug P12.5 milyones ang wheel clamping.
Samtang labing taas nga koleksyon sa Citom natumong sa buwan sa Enero nga niabot og P8.87 milyones samtang ang labing ubos mao ang buwan sa Abril nga niabot lang og P5.34 milyones.
Si Ouano nagkanayon nga sukad niadtong tuig 2010, ang Citom nag-average og P60 milyones nga kita matag tuig apan sa tuig 2017, iyang gipadayag nga nilapas sila og P20 milyones sa naandang kita sa maong buhatan.
Matod niya nga usa sa nakapasaka sa ilang kita mao ang paghingusog sa mga violator sa traffic laws ug ordinances, pay parking ug ang pagpatuman nila sa overnight parking ordinance diin ipan-clamp ang mga sakyanan nga mag-overnight parking gikan alas 12:01 sa tungang gabii hangtod alas 6 sa buntag.
Gihulagway operation chief sa Citom nga sukad niabot ang 100 ka clamp niadtong Oktubre, ang ilang koleksyon nikalit og saka. (PAC)