NIADTONG miaging semana, grupo sa mga sidewalk vendors ang mipahigayon og rally atubangan sa City Hall og midemanda sa pagpalagpot ni Probe Chief Raquel Arce diin ilang gihinganlan kining “berdugo.” Kanang berdugo mao nay executioner o tigpunggot sa ulo sa mga tawo nga gisentensiyahan og kamatayon sa kanhiayng panahon. Kini gumikan sa gipanghimo sa grupo ni Arce nga clearing operation batok sa mga sidewalk ug ambulant vendors. Kanang naa maninda sa daplin sa kadalanan kay ilegal man kana. Ilang gipasanginlan nga way balatian ug kasing-kasing og nakakomiter og inhustisya gumikan kay gipaligsan ang ilang gikompiskar nga paninda.
Morag iring ug ilaga ang mga manindahay ug ang mga sakop sa Probe team.
Niadtong miaging semana, nangreklamo usab ang mga lumolupyo sa F. Ramos extention kay gi-demolish usab sila sa taga Probe nga way igong pahibawo. Pero matod ni Arce nga dugay na nilang gipahimangnoan ang mga lumolupyo og gani ang uban kanila nahatagan na og disturbance fee. Kadaghanan kanila anaa na manimuyo sa dan. Ug gumikan niini gikiha si Arce sa usa ka laos nga pulitiko nga nagpakabana kunohay sa mga squatter. Nagpatuo-tuo usab ning tawhana nga tigpanalipod sa mga kabos.
Makontrahan
Lisod baya ning trabaho ni Arce kay makontrahan siya sa mga tawo nga maoy ilang target sa ilang clearing operation ug demolisyon. Unya kanang mga tawhana nanginabuhi ra usab intawon diha sa daplin sa dan pinaagi sa pagpaninda, apan ilegal lang. Ang kawad-on maoy nagtukmod kanila nga anha sila panginabuhi diha.
Pero di man god pod na himuon natong rason ang kawad-on nga mosupak lang pod kita sa balaod. Kanang sidewalk alang na sa mga pedestrians ug di angayan tindahan.
Pero in fairness ni Arce igo lang baya pod siya nagtuman sa mando ni Mayor Mike Rama nga mao ang iyang labaw. Ug ang tanang mando nga gikan sa mayor legal man na tanan. Kay kon di usab siya motuman ug mo-implementar niini mahimo man usab siyang inutil sa iyang trabaho. Busa igo lang siyang moingon sa mga naapektuhan nga ‘trabaho lang walang personalan’. Kon motuman lang sa balaod, way clearing operation ug demolisyon nga mahitabo.
Bug-at nga tahas
Bug-at kining tahas nga gipas-an ni Arce ilabi pa kay babaye siya ug huyang ang iyang kasingkasing. Kon mopatigbabaw ang iyang kaluoy, morag di kaayo siya epektibo sa iyang trabaho ug posibling yama-yamaan lang siya sa mga manindahay ug squatters. Usahay gikinahanglan nga mo-adopt og “iron fist” policy pagdisiplina ning ma badlungon.
(bobby.nalzaro@yahoo.com)