Nalzaro: Bahini sila, Mayor

MATOD pa sa atong kasaligang tinubdan nga adunay plano nga modangop ngadto sa korte ang mga sakop sa Bando Osmeña Pundok Kauswagan (BOPK) aron kuwestiyonon kining transaksiyon kabahin sa pagbaligya sa luna diha sa South Road Properties (SRP) ngadto sa tulo ka mga dagkong kompaniya, ang SM Prime Holdings, Ayala Land Inc. ug ang Filinvest. Porbida ni sila no, dili gyud mohunong hangtod nga madiskasi ang maong transaksiyon kay dili gyud sila gusto og ang ilang amo lang maoy makabaligya sa SRP sa panahon nga kining laos nga pulitiko makabalik diha sa City Hall. Nahibawo na kita sa motibo ning maong mga tawo. Personal interest lang ang ilang gihuna-huna ug dili ang kaayuhan sa dakbayan ug sa mga Sugbo-anon.

Nganong ila man gyud na nga barawon pa ang maong transaksiyon nga naa naman nang dako kaayong kuwarta nga nadawat sa dakbayan isip pasi-unang bayad sa mga nakapalit. Dako na kanang kuwartaha ug daghan nang mga proyekto ang matukod niana. Dili na magkaproblema ang pagtukod sa bag-ong Cebu City Medical Center (CCMC), masulbad na ang problema sa baha kay nakamugna na og comprehensive drainage system. Unya mabayran pa gyod ang tanang utang ngadto sa Japan International Cooperation Agency (Jica) gumikan sa pagmugna anang SRP. Unsa may gusto nila nga malubong ang dakbayan sa utang. Sabotahe man gyud nang ila.

Bahinan

Dawaton na lang unta nila ang kamatuoran nga na-isahan o nasurprisa sila sa gihimo ni Mayor Mike Rama nga iyang makonbensi ang mga buyers sa pagbayad sa downpayment bisan pa man sa ilang hugtanon nga pagbabag. Bisan unsa na lang rason ang ilang gipadayag. Nagmugna god sila og bakak. Kay gihulga kuno ni Mike ang mga buyers nga idiskasi ang maong transaksiyon kon dili nila dawaton ang notice of awards. Mahulga kaha nang mga tawhana nga mao man na sila ang mga leader sa real estate industry ug sa development og mga shopping malls. Wa sila kuyapi. Karon makabayad na ang siyudad sa utang sa Jica nga advance pa og napulo ka tuig.

Mo-ingon ba pod sila nga okey ra nga bayaran basta mosunod lang sa proseso. Ah, dili kaha malipay ang taga Jica ana? Sila pay manghagad nga mo-utang ang city governemnt kay sa ilang tan-aw maayo mobayad.

Ang akong sugyot ngadto ni Mayor Rama nga pang­hatagan og bahin kanang tanang mga konsihal aron mohilum na sila. Gahinan na ni Mike og tag-5 million pesos kada usa isip ilang development assistance fund. Bahala na sila og asa ihapak nga proyekto ngadto sa ilang mga distrito. Pila ray nagasto ana dili makaabot og usa ka gatus ka milyon ka pesos. Malipay na na sila labi pa kay nagsingabot na ang eleksiyon og aduna silay ikapasigarbo sa ilang mga konstituwente. Maayo kaha na, Mr. Mayor, nga imo pod silang bahinan?

(bobby.nalzaro@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph