HANGTOD karon wala pa gyud diay makatulog maghayang si kanhi mayor Mike Rama ug kanunay naghamok sa iyang galamhan ug huna-huna ang akusasyon nga siya usa ka drug protector. Mismo si Presidente Rodrigo Duterte mao ang mihingalan kaniya uban sa laing mga drug lords ug drug protectors. Mao nay iyang gi-ingon nga daw sama siya sa “buhing-patay” human siya hinganli.
Hangtod nga dili makorihir ang maong akusasyon kanunay kining pagapas-anon ni Mike hangtod sa hangtod. Ang Presidente ra usab mismo ang makalimpyo sa iyang pangalan.
Mao nga puwerting paningkamot sa kanhi mayor nga maka-connect o maka-estorya ngadto sa Presidente pamasin nga mahangyo nga malimpyohan ang iyang pangalan. Miduol na siya sa mga suod sa Presidente apil na ang executive assistant sa Presidente nga si Bong Go ug kanhi Presidente Gloria Macapagal Arroyo apan wala mamunga ang iyang paningkamot.
Mao siguro ni ang rason nga nanghagit siya og drug test sa iyang kaatbang sa pulitika, ang kanhi laos nga pulitiko, pamasin mga motuo ang mga tawo nga dili siya usa ka drug protector ug usa ka drug addict. Iya usab nga gihagit ang iyang kaatbang nga maghilum na lang o ba kaha mopasaka og kaso batok kaniya kon adunay ebedensiya aron mahunong na kining tanan. Nagplano man gani siyang modangop ngadto sa Korte Supreme aron hangyuon nga mo-imbestigar sa mga abogado nga gilambigit sa Presidente sa illegal nga drugas.
Usa ka abogado si Mike. Pero para nako, unsa may mahimo sa Supreme Court aning iyang isyo. Kon huwes pa unta siya puwedeng maaksiyonan kini sa Supreme Court. Usa ka dakong daman ug kalbaryo alang kang Mike kining maong isyu ug posible nga mao kini maka-ingon nga mahugno ang iya untang colorful political career. Kay mabalik-balik man gyud kining maong isyu matag karon ug unya labi na panahon sa eleksiyon. Himoon, kining kapital sa iyang mga kaatbang sa pulitika aron pagdaot kaniya.
Sa dihang gipangutana si Mike ni Atty. Frank Malilong sa tulumanon niini sa “Frankahay Ta” program sa dyCM, kon unsa ang mas bug-at og mapait niyang kasinatian. Una, na-suspenso siya sa wala pa ang eleksiyon. Ikaduha, napilde siya niadtong eleksiyon ug ikatulo, ang paghingalan kaniya sa Presidente nga drug protector. Ang tubag ni Mike nga ang masakit ug mapait alang kaniya mao ang paghingalan niya sa Presidente nga usa siya ka drug protector nga walay igong basihanan. Tinuod uy, sakit nang akusahan ta labi pa og dili tinuod. Pero ayaw kabalaka, Mike, kay matapus ra kining imong daman og kalbaryo sa pag-abot sa “tamang panahon.”
Ihangad lang kini sa Kahitas-an.
(bobby@sunstar.com.ph)