Nalzaro: Fraternity hazing

NUNOT niining kama­tayon sa ni Horacio Tomas Castillo, usa ka law student sa University of Santo Tomas (UST), gumikan sa hazing sa iyang umabot nga mga fraternity brothers sa Aegis Juris fraternity, namantsahan na usab ang imahin sa mga fraternities ug mitumaw na usab ang debate kon gikinahanglan ba gyud nga ang usa ka estudyante mosulod ug fraternity.

Si Castillo nagpasakop sa Aegis Juris Fraternity. Apan atol sa initiation rites namatay siya gumikan sa hazing. Gibiyaan lang intawon siya sa iyang mga umaabot nga mga brothers. Unsa may nga rason nganong ang usa ka tinun-an sa kolehiyo magpasakop man sa fraternity? Una, gumikan sa panagsamahan sa ubang mga tinun-an o brotherhood ug sisterhood. Dili lang sulod sa university o school campus o sa ilang college days kon dili hangtod sa hangtod.

Alang sa pagpalambo sa ilang abilidad dili lang sa academics kon dili sa ubang mga kalihukan isip usa ka estudyante. Ang ubang mga fraternity members mosalmot sa mga school debates ug sports ug ubang matang sa kompetisyon. Ug sa mga oportunidad kay daghan man ang mga senior brods nga naa sa posisyon nga makatabang gumikan sa koneksiyon.

Dili man bati o negatibo kon ang usa ka estudyante mag­pasakop sa fraternity. Pero kinahanglan nga ilang pilion ang ilang sudlan kay daghan na karon nga nagpaka-aron-ingon nga fraternity kuno apan gang diay. Naay uban diha nang-recruit ug mga tambay, minor de edad ug mga adunay criminal record.

Bisan pa man niining anti-hazing law aduna gihapoy mga fraternities nga misagop niini. Aw, kadtong nakalapas sama aning nahitabo si Castillo angayan kini silang manubag ug silutan.

Ang atong mga inilang political leaders sakop ug mga fraternity atol sa ilang student days. Kon bati pa ang magpasakop sa fraternity, dili unta kini sila molampos. Si Pres. Rodrigo Duterte sakop sa Lex Talliones Fraternity sa San Beda University diin siya mi-graduar.

(bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph