ADUNAY ipahigayon nga usa ka minuto nga kalihom sa dili pa sugdan ang Game 2 sa National Basketball Association (NBA) Finals tali sa Golden State Warriors ug Cleveland Cavaliers karong adlawa (RP time) isip pagyukbo sa kamatayon ni boxing legend Muhammad Ali.
Gawas niini, aduna sa’y ipasalida nga hamubong video or photo montage kabahin sa gitawag og “The Greatest” sa kalibutan sa boksing.
“When an icon like Muhammad Ali passes away, it’s very emotional,” matod sa usa sa mga sinaligan sa Cavaliers nga si LeBron James. “It’s also gratifying to know that a guy, one man, would sacrifice so much in his individual life knowing that it would better the next generation of men and women after him.”
Alang kang James, angayan lang nga tawagon si Ali nga “greatest of all time” gumikan sa mga kalampusan niini ibabaw sa ring.
Ang labing sinaligan sa Warriors nga si Stephen Curry nagkanayon nga nakadayeg siya kang Ali sa paggamit sa iyang popularidad isip boksidor aron ipadayag sa tibuok kalibutan ang gibati sa iyang dughan.
“Ali was the example of how you use your platform and speak what you believe no matter what people will say,” asoy ni Curry, “and (I) look at him (with) a sense of confidence in that regard, for sure.”
Si Ali nipanaw sa miaging adlaw gumikan sa sakit sa baga nga adunay komplikasyon sa iyang dugay nang sakit nga Parkinson’s.