MGA granada, armas, pistola ug gitouhang shabu ang nasakmit sa Martial Law Special Action Group (MLSAG) uban sa CIDG ug PDEA-10 kagahapon sa buntag gikan sa usa ka residente sa Apovel Subdivision, Bulua ning siyudad sa Cagayan de Oro.
Giila ang dinakpan nga mao si Rico Bacon, hingkod ang edad, residente sa susamang dapit ug giingong adunay dakong negosyo ddto sa kaulohan nga usa ka hardware.
Ang MLSAG uban ang Criminal Investigation and Detection Group (CIDG-10) ubos ni PC/Insp. Megar Devaras ug Philippine Drug Enforcement Agency (PDEA-10) pangulohan sab ni Regional Director Adrian Alvariño nagsilbi sa search warrant batok sa suspek nga giingong gilink sa pamilyang Parojinog didto sa Ozamis City.
Ang mga nasakmit gilangkoban sa 2 ka granada, armas ug 9mm nga pistola ug mokabat siyam ka pakete sa gitouhang shabu.
Matud ni Alvariño nga gipasaka nila ang search warrant tungod kay anaa na kini sa ilang target list sa PDEA-10 human nalambigit sab kini sa pamilyang Parojinog ug daw nalakip sa listahan ni Presidente Rodrigo Duterte human daw lakip sa grupo nga daw adunay negosyo sa yate apan maoy gagamiton sa pagtransport sa ginadili nga druga. Gimonitor kini nila og maayo sa wala pa gisilbi ang search warrant.
Apan si Bacon namahayag nga wala siyay kalabutan nianang illegal nga shabu apan aminadong naghupot og armas. Wala na usab kini kaayo nagpahinabi sa mga tigbalita tungod kay daw aduna siyay kuhaon nga abugado nga andam motubag niini.
Ang asawa sab ni Bacon nga si Mary Ann namahayag nga wala sila nanag-iya anang mga granada ug samot na sa mga shabu tungod kay daw gani dili sila gapanigarilyo sulod sa ilang balay.
Giklaro usab niini nga kaila lamang nila ang Parojinog apan dili soud nga higala. Ang magtiayon gidala na sa PDEA-10.