NAMATAY sa ambush ang usa ka tag-iya og mga boarding house ug apartment sa sitio Middle Nivel hills, Barangay Apas, siyudad sa Sugbo sa duha ka mga lalake nga sakay og yellow nga motorsiklo kagahapon sa udto.
Ang biktima mao si Felipe Angan-angan, 67, kinsa nakaangkon og mga samad sa liog, dughan ug ubang bahin sa lawas gikan sa 9mm pistol base sa nakuhang mga basiyo sa bala sa crime scene.
Si Angan-angan padung unta maghatod sa iyang apo sa tunghaan.
Matod ni PO3 Cristobal Geronimo, imbestigador sa Homicide Section sa Cebu City Police Office nga padung na molakaw si Angan-angan aron ihatod ang iyang apo sa tunghaan.
Apan ang duha ka mga killer nag-atang nang daan sa eskina, usa niini nga nag-jacket og itom kalit lang namusil.
Gidali pagdala sa pribadong tambalanan si Angan-angan, apan pipila ka gutlo ang nakalabay, namatay tungod sa kadaghan sa mga samad sa iyang lawas.
Si alyas Melchor nga usa sa mga nakasaksi, nitug-an nga iyang nakita ang panagway sa gunman sanglit nagpurong lang kini og itom nga panapton sa ulo ug nagsul-ob og sunglasses.
Human niini mamusil sa makadaghang higayon kang Angan-angan, dali kining niangkas sa motorsiklo nga XRM nga yellow ang color nga duna lay nabutang nga temporary plate.
Ang duha nipadagan padung sa barangay Lahug.
“Paatras na siya (Angan-angan), naa ko sa kilid. Naa dayon niduol, nya pagduol, buto-buto naman. Nya pagkahuman og buto, katong namusil padung na sa ubos,” matod ni Melchor sa dihang nahinabi sa Superbalita Cebu.
Samtang si PO3 Winston Ybañez nibutyag nga ang 16 anyos nga apo ni Angan-angan nagsakay uban kaniya.
Apan nakabantay kini sa gunman sa dayong pagpusil hinungdan nga nakahapa.
Gituohan nga kon wa pa makahupo ang dalagita, maigo unta kay sa iyang gilungkuran nitama ang duha ka mga bala, dugang ni Ybañez.
Nabantayan sa mga tawo sa dapit nga mga 15 minutos nga naghuwat ang mga killer kang Angan-angan sa dapit.
Sa pagsuwat ning taho, blangko pa ang kapulisan sa motibo sa pagpamanhig.
Ilang susihon kon wala ba kini gikakontra sa ilang lugar nga maoy ilang sundon sa ilang imbestigasyon.
“Ang motibo ato pa nang gi follow up kay estorya sa mga tawo, maayo ra man silag relasyon sa iyang mga silingan. Usa pa, naa ra daw ni siya permi sa sulod sa balay,” matod ni PO3 Cristobal Geronimo.
Apan ilang subayon kon wa bay naagrabyado sa yuta si Angan-angan sa ilang lugar.
Ipatawag usab nila si Melchor nga maoy nakakita sa panagway sa gunman aron mabuhatan og facial composite.
Nagtuo ang kapulisan nga gun-for-hire ang mga killer base sa pamaagi sa pagpusil niini.
Gisiguro, matod pa, sa gunman nga mamatay si Angan-angan pinaagi sa pagpusil niini sa makadaghang mga higayon.
Lakip sa ilang subayon ang mga close circuit television (CCTV) camera sa lugar kon dunay nakakuha niini sa dihang padung na nisibat ang mga killer.
Ang pamilya ni Angan-angan nagdumili pa una pagluwat og pamahayag sa nahitabo ug wa usab sila masayod unsay hinungdan nga gipusil kini.